Гаджет пен тұрмыстық электроника шығаратын Xiaomi алғашқы электрокарын әлі ресми таныстырған жоқ, көліктің тұсаукесері Гуанчжоу автосалонында өтеді. Оған дейін Қытай өнеркәсіп министрлігі жаңа седанның сертификат деректерін жариялады.
Алғашқы Xiaomi седаны SU7 деп аталды. Өлшемі бойынша ол Model S-пен шамалас: 4997×1963×1455, дөңгелек базасы — 3 метр. Өндіруші 20 дюймге дейінгі дөңгелек дискісі мен артқы спойлердің бірнеше дизайн нұсқасын ұсынып отыр. Суреттен төбедегі лидар мен көлік бүйіріндегі камераны көруге болады, бұл SU7-де үздік автономды басқару жүйесі болатынын білдіреді.
Седанның екі нұсқасы сертификат алды. Базалық көлік артқы осьтегі 299 ат күшіне ие жалғыз электромотормен жүреді, ал қымбат түрленімінің алдыңғы жағында тағы бір мотор болады, агрегат жалпы 673 ат күшін береді. Аккумулятор да екі түрлі, бірақ олардың сыйымдылығы жайлы ақпарат жоқ.
Xiaomi SU7-нің борттық медиажүйесі осы марканың смартфонымен байланысатын операциялық жүйемен жұмыс істейді деген ақпарат бар. Толық мәлімет ресми тұсаукесерде белгілі болады.
Xiaomi SU7-ні компанияның осы жобадағы серіктесі BAIC концерні өндіреді. Сынақ нұсқасын құрастыру басталды, сериялы электрокар желтоқсанда конвейерге тұрады. Ал саудаға 2024 жылы ақпанда шығады.
Комментариев: 0