Мұнай бағасының ауытқуы, одан кейінгі теңге бағамының құлдырауы халықтың көлікті ескі бағамен алуына ықпал етті. Қазақстандық автобизнес ассоциациясы (ҚАБА) берген мәліметтерге сүйенсек, наурыздағы сатылым 2019 жылмен салыстырғанда бірден 40 %-ға ұлғайған, яғни аталған кезеңде 6 377 жеңіл көлік пен коммерциялық техника сатылды.
Наурызда «тойоталардың» жақсы сатылғаны сонша, Camry үш ай өтісімен үздіктер көшін қайта бастады. Kia бұрын тапсырыс берілген темір тұлпарларын таратып, жағдайын біршама жақсартып алды. Алайда карантин басталысымен қызып жатқан сауда тоқтап қалды. 26 наурызда елдегі бүкіл мамандандырылған ХҚКО жабылып, көлікті тіркеуге мүмкіндік болмай қалды. Мемлекет бастапқы есепке онлайн режимінде қоюға жағдай жасау үшін барын салғанымен, сәуірде көлік сатылымы мүлде тоқтады. Бұл мүмкіндіктің қашан пайда болары әлі белгісіз.
Жалпы алғашқы тоқсан қорытындысы бойынша елдегі ең көп сұранысқа ие он көлік тізімін 3 539 (+3.5 %) автокөлік сатқан Lada бастап тұр. Ал екінші орындағы Hyundai көліктерінің 3 094 данасы (+31.7 %) өз иесін тапқан. Toyota дилерлері осы жылдың алғашқы тоқсанында 2 653 (-8.7%) машина сатты.
Төртінші орында Kia (1 924 дана, +123 %) тұр. Одан кейінгі орындарға жуырда атауын Chevrolet деп өзгерткелі жатқан Ravon (1 873 дана), Renault (753 дана, +49.4 %). ), Nissan (528 дана, +11.9 %) жайғасты. Алғашқы тоқсанда үздік нәтиже көрсеткен он марка қатарында Volkswagen (516 дана, +32 %), Lexus (334 дана, -1.2 %) және UAZ (285 дана, -8.1 %) бар.
Жоғары сұранысқа ие үздік 10 үлгі (қаңтар-наурыз 2020 ж.)
Комментариев: 0