Алматы қаласының Бостандық аудандық соты Әл-Фараби, Шығыс айналма жолы мен Саин көшесіндегі жылдамдықты сағатына 80-нен 60 шақырымға дейін шектеудің заңдылығына қатысты істі қарады. Әмір Бегдесенов есімді заңгер жергілікті полиция департаменті мен қалалық мобильділік басқармасына қаңтар айында шағым түсірген болатын. Оның ойынша, бұлай жасауға биліктің еш құқығы болмаған.
Қалалық соттың баспасөз қызметі хабарлағандай, істі қарау барысында алматылық жеңіліс тапты. Шешімнің мотивациялық бөлімінде сот ҚР «Жол жүрісі туралы» заңының жол жүрiсiне қатысушылардың өмiрi мен денсаулығының шаруашылық қызметтiң экономикалық нәтижелерiнен басымдығы қағидат ретінде жазылған 3-бабына сүйенеді. Біз білетіндей, билік дәл осы жылдамдықтың шектелуі жолдағы апаттың санын азайтуға себеп болғанын айтқан болатын.
Сонымен қатар, сотта жоғарыда аталған көшелердегі шектеу өз талап-арызында бұзылды деп көрсеткен азаматтың жайлылығы мен қызмет алуға деген құқығына еш әсер етпейтіндігі баса айтылды.
— Полиция департаментінің әрекетінен арыз берушінің субъективті құқықтары, еркіндігі не заңмен қорғалатын мүдделері бұзылмаған, өз құқығы, еркіндігі не заңмен қорғалатын мүдделеріне кедергі келтірілмеген, оған заңсыз түрде міндеттер жүктелмеген, — деп қорытындылады сот.
Шешім заңды күшіне әлі енген жоқ.
Комментариев: 0