«Казахский Промтранспроект» ЖШС әзірлеген «Әл-Фараби — Ремизовка қиылысын қайта құру» жобасы қоғам талқысына түсті. «Қазір Үшкемпіров көшесінің Әл-Фараби даңғылына қосылатын тұсында көліктер қарбалас уақытта қатты кептеледі, апат жиі болады, дұрыс көрінбейді, бұрылатын жерлер қолайсыз, жаяу жүргінші өткелдерінің жағдайы нашар, нормативтік талаптарға сай келмейді», — деді құжат авторлары.
Жобалаушылар даңғылдың Үшкемпіров және Қаппаров көшелерімен қиылысын жөндеудің төрт нұсқасын ұсынды:
1. Әл-Фарабидің оңтүстігіне Үшкемпіров пен Қаппаровтан кіріп-шығатын бұрылыстары бар айналма жол салу. Артықшылығы — объектінің аумағы шағын, көп ағаш кесудің қажеті болмайды, солға бұрылатын жерлерді толық қамтиды. Кемшілігі — Әл-Фарабиден батыс бағытта машина солға бұрыла алмайды, ол үшін Жароковтан кері бұрылуға тура келеді. Жалпы мұндай жолайрықтың өткізу қабілеті шектеулі әрі кейін ұлғайту мүмкіндігі жоқ.
2. Әл-Фарабиге екі бағыттан тікелей қосылу, арнайы оңға бұрылыс жолақтары және қозғалыс қиылысатын тұстарға бағдаршам қою. Бұл нұсқада да солға бұрылуға болады. Кемшілігі — Әл-Фарабиге қосылған тұста жолақ ауыстыруға аз арақашықтық қалады. Батыс бағытта даңғылдан солға бұрылуға келмейді. Бұдан бөлек, бағдаршамдардың кесірінен қиылыстың өткізу қабілеті төмен болуы мүмкін.
3. Әл-Фарабиде эстакадасы бар «бөлуші айналма жол» тәрізді екі деңгейлі жолайрық салу. Барлық солға және оңға бұрылыс айналма жол арқылы жерде жүзеге асады. Эстакаданың ұзындығы — 390 м, рампалы бөліктері — 140 м. Жаяу жүргіншілер өткелі эстакаданың астында оң жақтағы жолмен қиылысып бір деңгейде өтеді, жерасты өткелі салынбайды. Кемшілігі — эстакаданың ұзындығы, жұмыс кезінде Әл-Фарабиде көлік қозғалысын тоқтату қажет, айналма жолдар ұзын болады және көп жерді алып тұрады.
4. Даңғылдың үстінен өтетін айналма жол (Үшкемпіровтен Ремизовкаға шығады) және трамплин мен Қаппаров көшесі жағынан Аль-Фарабиге тікелей қосылатын екі эстакада салу. Артықшылығы — барлық қажет солға бұрылыстар бар. Кемшілігі — көпірлер өте ұзын (қисық эстакада — 187 м, тірек қабырғалары — 60 м, түзу эстакада — 72 м, тірек қабырғалары — 60 м), қосымша жер алу керек, құрылыс қымбатқа түседі.
Әзірге Алматы қаласы Мобилділік басқармасында өткен жиналыста шамамен 3.6 млрд теңгелік айналма жолды әрі қарай әзірлеу жөнінде шешім қабылданды.
Қиылыстың құрылысына 15 ай кетеді деген болжам бар. Жұмыс 2026 жылдың мамырында басталуы мүмкін.
Комментариев: 0