АҚШ-тағы дилерлік орталықтардың бірі 1997 жылғы Mitsubishi 3000GT толық жетекті купесін сатылымға шығарды. VR-4 индексіндегі модель 20 жылда 7321 миля жол жүріпті, бірақ зауыттан кеше шыққандай көрінеді.
Mitsubishi 3000GT-ді түсі үшін өте сирек кездесетін көліктер қатарына қосуға болады. Бұл реңк Panama Green деп аталады. Солтүстік Америкада аталған түске боялған небәрі 71 машина бар. Шанақ түсі оңып кетпес үшін купе мөлдір қабықшамен қапталыпты.
Капот астына қосарлы турбоүрлемді 3 литрлік V6 орнатылған. Агрегат 320 ат күші мен 427 Нм айналу моментін дөңгелектерге механикалық қорап арқылы береді.
1997 жылы су жаңа Mitsubishi 3000GT VR-4 45 938 доллар тұратын, ал қазіргі бағасы — 59 997 доллар.
3000GT-ді Қазақстаннан да табуға болады. Материал дайындалған сәтте Kolesa.kz-те екі көлік сатылымда болды. Одан бөлек бізде модельдің GTO деп аталатын «сыңары» бар. Спорткар бағасы 2.2-4.5 млн теңге аралығында.
Комментариев: 0