Шымкент мұнай өңдеу зауытында шілдеде жылуалмастырғыш істен шығуына байланысты туындаған жағдай қазір бақылауда деп сендірді. Құрылғыны жөндепті-мыс, ал жаңасын келер жылдың басында әкеледі екен.
«Хабар 24» телеарнасы эфирінде «ПетроҚазақстан Ойл Продактс» ЖШС-нің техникалық директоры Бақыт Ерегенов «Зауыт АИ-92 100 % шығарып жатыр, осы айда 5800 тонна АИ-95 өндірдік. Қыркүйек-қазан айларында 10 мың тоннадан шығарамыз деген жоспар бар», — деді. Оған сенсек, зауыт 17 мың тоннадан аса мұнай өндіріп жатыр және мүмкіндігі мұнымен шектелмейді.
Қолда бар ақпаратқа сүйенсек, жылуалмастырғыш тамызда бір-ақ рет қосылған. Сол кезде бес мың тоннадан асатын АИ-95 шығарып үлгерген сияқты. Қыркүйекте құрылғыны қайта қосып көреді, бірақ сынған жабдықты жиі қолдану қауіпті.
Жаңа құрылғыны қысқа қарай әкеледі. Қытайдан әкелудің өзі біраз уақытты талап етеді. Оны Қытай жаңа жылына дейін жасап, жеткізіп үлгерсе жақсы. Олай болмаған жағдайда жылуалмастырғышты көктемге дейін күтеміз. Содан кейін ғана оны құрастырып, баптап, іске қосуға болады.
95 маркалы бензин оңтүстікке Атырау зауытынан келеді. Батыстан шыққан цистерналар Алматыға жету үшін он күн керек. Логистика тым қымбат, бірақ жанармай компаниялары барлық жауапкершілікті өз мойнына алып, АИ-95 бағасын өсірмейміз деп сендірді. Бірақ бұл Ресейден келетін көгілдір отынға қатысты емес. Қыркүйекте ол жақтан елімізге 3 мың тонна отын жетеді. Солтүстіктен келген жанармайдың литрі 400 теңгеден басталуы мүмкін. Бірақ елдегі бекеттерде ресейлік бензин аз, оны тек ассортимент үшін әкеліп жатқан сияқты.
Комментариев: 0