Жаңа асфальт төселген соң Әуезов — Абай қиылысында бір жылдан аса уақыт жол таңбасы болған жоқ. Жақында жол жөндеушілер таңба сызды, бірақ бес жыл бұрынғы сияқты стандартты бұзыпты. Яғни сызық тым ұзын, жол ережесін бұзбай бұрылу мүмкін емес.
Бұл қиылыста солға бұрылғанда тым баяу жүрсеңіз де қосарлы сызықты баспай немесе өзге жолаққа шықпай өту оңай болмайды. Ал жаңа жол ережесі бойынша жүргізуші тек өз жолағымен (мына жағдайда сол жақтағы жолақпен) бұрылуы керек. Қарбалас уақытта мұндай маневр жасау мүмкін емес. Kolesa.kz редакциясына жүргізушілер хабарласып, полиция қиылысты аңдып, жол ережесіне сай бұрыла алмаған автомобилистерді ұстап, қарсы бағытқа шыққаны үшін хаттама толтырып жатқанын айтты. Мұндайда жүргізуші алты айға көлік басқару құқығынан айырылады.
Әкімшілік полиция басқармасы
Біз бұған дейін дұрыс емес жол таңбасының кесірінен жүргізуші куәлігінен айырылған азаматтар оны қалай қайтара алатынын түсіндірген едік. Осы жолы Абай — Әуезов қиылысындағы қосарлы бүтін сызық үшін куәлігінен айырылған жүргізушілер де біз жазған тәсіл бойынша әрекет етсе болады.
Сондай-ақ жүргізушілер Назарбаев — Сәтбаев қиылысындағы тағы бір «қақпанға» шағымданып жатыр.
Автомобилистердің айтуынша, Назарбаев бойымен солтүстікке қарай сол жақтағы жолақпен жүргенде күтпеген жерден қарсы бағытқа шығып кетесіз. Ал онда бұл туралы ескерту белгісі жоқ!
Kolesa.kz редакциясы бұл қиылыста қандай проблема туындағанын барып көрді. Назарбаевтың Сәтбаевтан төмен бөлігінде жоғары қарай жүретіндер үшін солға бұрылатын үшінші жолақ пайда болыпты. Солтүстікке қарай жүретін машинаға үш емес, екі жолақ қана қалған. Осы тұста ось оңға қарай жылжыпты. Соған сай Сәтбаевтағы жол таңбасы да сәл оңға ығысқан.
Егер тіке жүрсеңіз ешқандай проблема туындамайтын сияқты. Біздің ойымызша, жол таңбасы жолақ бойымен жүретін бағытты көрсетіп тұр. Бірақ бұл жердегі жол еңіс, ал Сәтбаев бойында тегіс, одан кейін қайта еңіс болады. Салдарынан жол таңбасы қисайып, Назарбаевтың Сәтбаевтан төмен бөлігіндегі жаңа жолақ пен қосарлы бүтін сызық бірден көрінбей, көліктер қарсы бағытқа тап болады. Полиция жүргізушілерге қозғалыс схемасы өзгергенін ескертуі керек еді. Қиылысқа кіре берісте 5.8.1 «Жолақ бойымен жүру» белгісі бар, бірақ ол шыршалар арасынан көрінбеуі мүмкін.
Әкімшілік полиция басқармасы бұл қиылыста үзік сызық сызуға уәде берді. Біз Назарбаев бойымен солтүстікке қарай жүргенде Сәтбаевтан төменде екі жолақ қана барын еске саламыз.
Жолыңыз болсын!
Комментариев: 0