7 сәуірден бері сақтандыру полисін рәсімдеу мүмкін болмай тұр

Сақтандыру полисін алу қиындап кеткеніне шағымданған оқырмандар Kolesa.kz редакциясына хат жазды.

«Жүргізушілер сақтандыру рәсімдей алмай жүр, кейбіреулерінің сақтандыру класы төмендеп, ең жоғарғы 13-категориядан А класына (жаңадан көлік жүргізе бастағандар) түсіп кеткен. Енді сақтандыру компаниялары міндетті сақтандыру полисі үшін үш есе қымбат ақы сұрауға мәжбүр, салдарынан жүргізушілер арасында түсініспеушілік, шиеленіс пен наразылық туды», — деп жазды автокөлік иелері.

Қаржы нарығын реттейтін агенттік өкілдерінен жағдайды түсіндіріп беруін сұрадық. Мамандар 7 сәуірден бері бірыңғай сақтандыру деректер базасында (БСДБ) ақау пайда болғанын хабарлады. 12 сәуірде база іске қосылғандай болғанымен, 15 сәуірде жүйе қайтадан қате туралы хабарлама көрсете бастаған.

Нәтижесінде жүргізушілер міндетті сақтандыру полисін рәсімдей алмай жатыр, ал онсыз көлік тізгіндеуге рұқсат жоқ. Айыппұл — 10 АЕК (39 320 теңге).

Реттеуші орган бұған жаңа сақтандыру класын енгізу процесінің еш қатысы жоқ деп мәлімдеді. Бірақ сақтандыру компаниялары өздері қолданатын базаны полицияның әкімшілік құқық бұзғандарды тіркейтін дерекқорымен біріктіргенде ақау шықты дейді.

Міндетті сақтандыру келісімшартын жасау барысында бонус-малус класын алғанда қате бары анықталса, Мемлекеттік кредиттік бюроға жүгініп, деректі өзгерту туралы арыз жазу керек. Мекеменің байланыс мәліметі мен өтінім беру нұсқаулығын mkb.kz сайтынан табасыз.

Ведомство қызметкерлері бонус-малус пен сақтандыру тарихын eGov Mobile мобильді қосымшасындағы «Кредит және сақтандыру тарихының гиді» сервисі арқылы білуге болатынын айтты.

Сақтандыру базасы қашан іске қосылатыны әзірше белгісіз. Жаңалықтарды бақылап отырыңыз!