6 мамырдан бастап жол ережесіне бірнеше өзгеріс енеді

Ішкі істер министрінің жол ережеcіне өзгеріс енгізу туралы бұйрығы 25 сәуірде жарияланды, ол 6 мамырда күшіне енеді. Құжат авторлары «жаяу жүргіншілер өткелі», «қиылыс» ұғымдарын түсіндіріп, «жол апатын жеңіл жолмен рәсімдеу» деген жаңа термин қосты, мұнда мәселені полиция шақырмай шешуге мүмкіндік беретін еуропротокол жайлы сөз болып отыр.

Бүтін сызықты кесіп өтуге тыйым салынады

Бүтін сызықты кесіп өтуге тыйым салу жаңа ережедегі ең қатал талаптардың бірі. 6 мамырдан бастап ҚР жол ережесіне жаңа 62-1 тармақ қосылады, ол бойынша «1.1. (бүтін сызық — Ескерт. Kolesa.kz) жол таңбасымен бөлінген екі жолағы бар екі бағытты жолда және (немесе) 3.20 белгісі (басып озуға тыйым салынады) қойылған жолда қарсы бағытқа шығуға болмайды».

Новые знаки и лишение прав за одиночную сплошную в ПДД с 6 мая

Бүтін сызықты кесіп, қарсы жолаққа шыққан жүргізуші әкімшілік кодекстің 596-бабы 3-тармағына сай жазаланады, онда «жолдың қарсы қозғалысқа арналған бөлігімен жүрсе (кері айналу немесе бұрылу үшін шықса), 6 ай мерзімге көлік басқару құқығынан айырылады» деп жазылған.

«Плюс» белгісі

Ережеде қосымша жасыл түсті «+» белгісі бар бағдаршам пайда болады, ол қарсы бағыттағы көліктерге бағдаршамның қызыл түсі қосылғанын білдіреді (бұрын жол ережесінде «плюс» белгі қызыл түсті болған).

Бағдаршамның сары түсіне өту

Сары түс жанғанда қиылысқа кіруге толық тыйым салынған жоқ, «бағдаршамның жасыл түсі өшпес бұрын жыпылықтамаған» жағдайда сары түске өтуге рұқсат берді. Сол сияқты жол диспетчері қол көтерген кезде жүргізуші тоқтап үлгермесе, қиылысқа кірсе болады.

Сондай-ақ ережеде «диспетчер қолын көтергенде немесе сары түс жанғанда жаяу жүргіншілер жолдан шығуы керек, ал бұл мүмкін болмаса, екі бағыттағы көлік легін бөлетін сызыққа тоқтауы керек» деп жазылады.

Кім кімге жол береді?

Жол ережесінің 49-тармағында енді «қосалқы жолдан шыққан кезде жүргізуші басты жол бойымен жүріп келе жатқан көлік құралы мен жаяу жүргіншіге, ал негізгі жолдан шығар кезде өзі кесіп өтетін жол бойындағы көлік құралы мен жаяу жүргіншіге жол береді» деп жазылады.

Тек өз жолағымен бұрылу керек

53-тармақта «бұрылыс жолдың жүріс бөлігінің қиылысынан шыққан кезде көлік құралы қарсы келе жатқан көлік жағына шықпайтындай жүзеге асырылады. Бұрылыс маневр жасаған сәттегі жолақ бойынша жүзеге асырылады» деп жазылған.

Біздің ойымызша бұл шешім аса ыңғайлы емес. Бір жағынан, екі автомобиль бір уақытта бір бағытқа бұрылғанда екеуі қиылыспайды, бұл қауіпсіздікке пайдалы. Бірақ екінші жағынан, кешкі немесе таңғы кептеліс кезінде өз жолағыңмен ғана жүру өте қиын. Kolesa.kz редакциясына ҚР ІІМ Әкімшілік полиция комитеті түсіндіргендей, мұндай жағдайда жүргізуші өз жолағымен бұрылу керек, егер ол бос болмаса, тіке жүру керек, қиылыста жолақ ауыстыруға тыйым салынады.

Кері бұрылу радиусы

Радиусы үлкен қиылыста да, кіші қиылыста да кері бұрылуға рұқсат беріледі. Осы мақсатта жол ережесіне 54-1 тармақ қосылып, онда «радиусына қарамастан, қозғалуға қауіпсіз болса және басқа көлік құралына кедергі жасамаса ғана кері бұрылуға болады» деп жазылады.

Автобус жылдамдығын шектеу

73-тармақта былай деп жазылады: «Елді мекендерде:

автобустарды және тиiстi жол белгiлерiмен белгiленген, бiрақ 90 км/сағ-тан аспайтын арнайы қозғалыс режимiн қоспағанда, көлiк құралының 60 км/сағ-тан аспайтын жылдамдықпен жүруiне;
автобустың 50 км/сағ-тан аспайтын жылдамдықпен жүруіне;
көлік құралының тұрғын үй аумағы мен аулаларда 20 км/сағ-тан аспайтын жылдамдықпен жүруіне рұқсат етіледі».

Көліктің оң жағынан өту

Ережеде қарсы келе жатқан көліктердің солға бұрылу әдісі белгіленді, 95-1 тармақта «қиылыста солға бұрылған кезде кейбір ерекше геометриялық параметрі бар қиылыстарды қоспағанда, қарсы бағытта келе жатқан машинаның оң жағынан өту керек» деп жазылған.

Арнайы жолақпен кез келген автобус жүре алады

Ережеде арнайы жолақпен жүре алатындар тізімі көбейді, енді онда қоғамдық көліктен бөлек, «М3 санатындағы кез келген көлік» жүре алады, яғни жүргізуші орнынан бөлек тағы 8 орындығы бар, салмағы 5 тоннадан асатын автобустар да арнайы жолақпен жүрсе болады.

Жаңа жол белгілері мен жол таңбалары

Жол ережесіне жақында стандартқа енген жаңа жол белгілері мен «қиылысты реттеу аймағын» көрсететін вафельді белгі 1.28 жол таңбасы қосылады. ІІМ мұның жүргізушілерден нені талап ететінін түсіндірген жоқ. Бұрын «көлік құралдарының қозғалысына кедергі келтіріп, жүргізушіні қиылыс шегінде тоқтауға мәжбүр ететін кептеліс қалыптасқан жағдайда» кіруге болмайтын қиылысты осылай белгілеу ұсынылған. Бұл мәселе бойынша полицейлерден жауап күтеміз.

Жаңа арнайы белгілер

6 мамырдан бастап автомобильдерге арнайы белгілер — «Электромобиль» (көліктің артқы жағына) және «Газ баллон жабдығын орнатқан машина» (ГБЖ бар көліктің артқы және алдыңғы жағына) белгісі ілінеді. Сондай-ақ «Мүмкіндігі шектеулі адам» белгісін «III топтағы мүгедектер мінген көлікке немесе осындай адамдарды таситын көлік құралына» ілуге болады.