Mecum аукцион алаңы үшінші буындағы Toyota Hilux-ті сатылымға шығарды. АҚШ-та оны әдетте пикап деп атайды.
Автокөлік 1981 жылы жасалған, бірақ конвейерден биыл шыққандай көрінеді. Ол 40 жыл бойы гаражда сақталған машина емес. Сатуға шығарардан бұрын пикапты толық жөндеуден өткізген. Көліктің шанағы ғана емес, рамасы мен салоны да қайта қалпына келтірілді.
Hilux 98 ат күшін беретін 2.4 литрлік 22R атмосфералы моторы арқылы қозғалады. Агрегат 5 сатылы механикамен жұмыс істейді. 175 Нм момент артқы дөңгелектерге беріледі. Модельге толық жетек қосуға мүмкіндік бар.
Сатушылардың айтуынша, кезінде адамдар Hilux-ке тек жұмыс күші ретінде қараған жоқ. Автокөлікте ортаңғы шынтақ тірегіш, салқындатқыш және аудиожүйе бар. Музыка түпнұсқа Fujitsu Ten қабылдағышы арқылы қосылады.
Машинаны жөндеген шеберлер аздап тюнинг жасаған. Артқы бампер, қосымша оптика және жолсызбен жүруге арналған дөңгелектер соны аңғартады.
Mecum сарапшылары Hilux-ті 50 мың долларға (22,4 миллион теңге) бағалап отыр. Қазақстанда мұндай ақшаға толық жабдықталған су жаңа Toyota пикабын сатып алуға болады. Ал АҚШ-та TRD нұсқасындағы Toyota Tundra-ның бағасы 49 мың доллардан басталады.
Комментариев: 0