Қазақстанда 16 мамырдан бастап утилизациялық алымның жаңа мөлшері күшіне енді. Төлем мөлшері азаяды деген үмітпен елге мыңдаған көлік әкелінген. Бірақ «Жасыл Даму» Қазақстан аумағына 2022 жылы 16 мамырға дейін келген көлікке алым бұрынғы тарифпен төленетінін хабарлады. Олар өндірушінің (импорттаушының) кеңейтілген міндеттемесін орындау туралы ерженің № 4 тармағына сілтеме жасады, онда «өндірушінің (импорттаушының) кеңейтілген міндеттемесі импорттаушы Қазақстан аумағында сатылатын өнімді ҚР мемлекеттiк шекарасынан өткiзген сәттен бастап күшіне енеді» — делінген. Бірақ кейін утиль алымы сату үшін әкелінген машинаға ғана төленетіні белгілі болды. Ал азаматтар өзі міну үшін әкелсе сұралмайды екен.
Kolesa.kz шенділерге заңдағы қайшылық туралы сонау 4 мамырда хабарлаған. Бірақ олар ештеңе өзгерткен жоқ. Нәтижесінде 16 мамырдан бастап Экология министрінің блогы халықтың арыз-шағымына толып қалды. Өткен аптаның аяғында Экология министрлігі мәселенің түпкілікті шешілгенін мәлімдеді.
— «Жасыл даму» АҚ-мен утиль алымының жаңа мөлшері туралы кеңес өткіздік. ҚР экология, геология және табиғи ресурстар министрінің 2022 жылы 29 сәуірдегі № 138 бұйрығына сәйкес утилизациялық алым мөлшері 50 %-ға төмендеді. Бұйрық биыл 14 мамырдан бастап күшіне енді.
Егер утиль алымы 2022 жылы 14 мамырдан кейін бұрынғы тариф бойынша төленсе, «Жасыл Даму» АҚ заңға сәйкес артық төленген соманы қайта есептеп, қайтарады», — деп мәлімдеді министрлік. Шенділер утиль алымын төлеу туралы жаңа талап 23 мамырда күшіне енетінін хабарлады.
Демек жаңа тариф енгізілгенге дейін, наурыз немесе сәуір айында көлік әкелген азаматтар 23 мамырдан бастап утиль алымын жаңа тариф бойынша төлейді. Ал бұрынғы талап бойынша төлеп қойғандарға «Жасыл Даму» артығын қайтарады.
Утилизациялық алым жинау ережесі түбегейлі өзгере ме, жоқ па министрлік нақты мәлімет берген жоқ. Тұрғындар бұрын сату үшін емес, өзі міну үшін әкелген көліктер мәселесі қалай шешілетіні де белгісіз.
Комментариев: 0