2030 жылы әр үшінші жаңа автомобиль қытайлық болады

2030 жылға қарай Қытай автоөнеркәсібі әлемдік нарықтың үштен бірін жаулайды. Мұндай болжамды AlixPartners сарапшылары жасаған, олар Қытайда жаңа автомобиль өндірісінің көлемі жылдам өседі деп мәлімдеді. Қытай негізінен батыс өндірушілері үстемдік ететін елдерде саудасын қыздыруды көздеп отыр.

Қытайда жергілікті брендтер алдағы жылдары өз үлесін қазіргі 59-дан 72 %-ға арттырады. Жаһандық нарықта үлесі 30 %-дан асады. Сарапшылар онжылдықтың аяғына қарай Қытай компаниялары жылына 9 миллион автомобиль сатады деген болжам жасап отыр, бұл қазіргі көрсеткіштен шамамен үш есе көп.

Еуропа мен Ресейде Қытай брендтері 2030 жылға қарай нарықтағы үлесін екі есе арттырғанмен, басқа аймақтарда әлдеқайда қарқынды өседі деген болжам бар. Мысалы, Оңтүстік Америкада үлесі 7-ден 28 %-ға, Таяу Шығыс пен Африкада 8-ден 39 %-ға, ал Оңтүстік-Шығыс Азияда 3-тен 31 %-ға өседі, яғни он есе артады. Нәтижесінде Қытай автомобиль саласындағы ғаламдық көріністі айқындайтын ойыншылардың бірі болады дейді сарапшылар.

Мамандардың айтуынша бұл елдегі өндірушілердің осылай қарқынды дамуына мүмкіндік беретін негізгі артықшылық — жаңа көлікті бәсекелестеріне қарағанда екі есе жылдам жасау. Осылайша олар нарықтағы өзгерістерге қарай тезірек әрекет ете алады, сатып алушылардың қажеттіліктеріне бейімделе алады. Қытай компаниялары әлдеқайда арзан өндіріс ұйымдастыра алады, бұл оларға ашық демпинг жасауға мүмкіндік береді.

Соңғы жағдай қазір Еуропа билігін мазалайды. Алдағы күндері ЕО мен Қытай арасындағы келіссөздер сәтсіз аяқталса, Қытай электрокарына кедендік баж айтарлықтай өседі.