2025 жылы Tesla арзан кроссовер шығарады

Tesla қазір Redwood атауымен танымал жаңа модельге компонент жеткізетін мердігерлермен келіссөз жүргізіп жатыр. Бұл туралы Reuters жағдаймен таныс дереккөзге сілтеме жасап жазды. Tesla 2025 жылдың маусымында АҚШ-та электрокар өндірісін бастауды көздеп отыр.

Бренд құрамдас бөлшек жеткізушілерден аптасына 10 мың жаңа электромобиль шығаруға жететін компоненттердің болжалды бағасын сұрады. Дереккөздің бірі компания оптимистік жоспар құрды және жаппай өндірісті іске қосу 2026 жылға шегеріледі деп болжады. Tesla инженерлері бұған дейін АҚШ-тағы ең арзан модельдің бірі Honda Civic көлігін қарастырып, сапаны жоғалтпай көлікті қолжетімді ету жолдарын зерттеу үшін пайдаланғаны хабарланған.

Брендтің бас директоры Илон Маск бұған дейін арзан электрокар шығару мүмкіндігі туралы бірнеше рет айтқан болатын, бірақ кішігірім хетчбэкті (Model 3-тің кішірек нұсқасы) сөз етті деп болжанған. Қазір Reuters дереккөздері ықшам кроссовер туралы анық айтып жатыр. Бренд бюджеттік топтама үшін жаңа платформа дайындауда, бұл бірнеше жаңа модель пайда болуы мүмкін дегенді білдіреді. Model 3 және Model Y сияқты жұп құрайтын шығар. Жаңа өнім компанияның қазіргі ең қолжетімді электромобильдерінен кемінде 10 мың доллар арзан болуы керек.

Әзірге тек АҚШ-тағы Tesla зауыттарының бірінде электромобиль шығару туралы айтылды. Компания бұрын Берлиндегі Gigafactory сияқты басқа кәсіпорындарда жаңа көліктер шығару мүмкіндігін меңзеген. Tesla қазір бірнеше елдің басшысымен қосымша зауыт салу туралы келіссөз жүргізіп жатыр.