Қазақстанда жаңа көліктер жыл сайын қымбаттайды. 2020 жылы да үрдіс қайталанды. Алғашқы өсімге наурыз айының ортасында доллардың күрт қымбаттауы себеп болған. Ол кезде кейбір ақша айырбастау орындары АҚШ валютасын 445 теңгеден саудалады. Салдарынан алдымен Kia сатушылар тауар бағасын ауыстырса, артынша басқа компаниялар да көлік құнын арттырды. Нәтижесінде көктемнің соңына қарай нарықтағы барлық саудагерлер көлік бағасын көтерді. Бір жыл ішінде су жаңа темір тұлпарлар қаншалықты қымбаттағанын анықтау үшін елдегі сұранысы жоғары модельдердің прайсын қараймыз.
Зерттеуді Lada Granta-дан бастайық. Өткен жылдың басында ең қарапайым седан 2.8 млн теңгеге бағаланды. Ал қазір анағұрлым қолжетімді «Грантаны» алам десеңіз 3.7 млн теңге (+30.8 %) санап беруге тура келеді. Ал үздік нұсқасы 4.2 млн теңгеден 4.6 млн теңгеге қымбаттады.
Nexia былтыр біздің елде ең көп сатылған көліктер тізімінде екінші орын иеленді. Бұл машинаның құны бір жыл ішінде шамамен 300 мыңға артты. Қарапайым көлікті 3.8 млн теңгеге, ал үздік нұсқасын 4.7 млн теңгеге алуға болады.
Келесі орында Hyundai-ге тиесілі Accent пен Tucson тұр. 2020 жылы седан жаңарғанмен, бағасы бірден көтерілмеді. Жыл басында 1.6 литрлік моторы мен автомат қорабы (Active Plus) бар седан үшін 6.3 млн теңге сұралатын, ал қазір оны алатын адам 6.6 млн санап береді. Үздік нұсқасы көктемде 6.8 млн тұрған, енді оны 7.1 млн теңгеге сатып жатыр. Start жиынтығындағы Tucson 9.4 млн теңгеден 10.1 млн теңгеге қымбаттады. Толық жетекті көлік үшін қосымша 400 мың жұмсайсыз.
Елдегі аса танымал көліктердің үздік бестігін Toyota Camry түйіндейді. 2020 жыл басталғанда 10.8 млн теңгесі бар тұрғын 2 литрлік моторы бар «Классик» алатын еді, ал «Стандарт» алғыңыз келсе тағы 100 мың қосу қажет болды. 2.5 литрлік мотор орнатылған «Комфорт» жиынтығындағы седан бағасы 600 мыңға артты. Ал бұрын 18 млн теңгеден саудаланған 3.5 литрлік қозғалтқышы бар «Люкс» нұсқасы қазір 18.9 млн теңге тұрады.
Келесі бестікке Lada Vesta, Chevrolet Cobalt, Kia Rio, Lada 4×4 және Hyundai Creta енді. Олардың бағасы моделі мен нұсқасына байланысты 2-ден 42.6 %-ға дейін көтерілді. Осы тізімде Lada 4×4 пен Kia Rio назар аудартады. 2020 жылдың басында қарапайым «Нива» 3.4 млн теңге тұратын. Ал қазір оны алам деушінің қалтасында 4.85 млн болуы тиіс. Айта кетерлігі, алғашында 4×4 науқан бағасымен сатылған еді, ол кезде «Гранта» 2.8 млн теңгеге сатылды. Жол талғамайтын көліктің де құны едәуір артты. Қазір Bipek Contact жүйесіне ие 21214-008-51-01 индексіндегі машина 4.85 теңгеден саудалануда, ал бұрын оны 3.95 млн теңгеге алуға болатын.
Kia Rio өткен жылы жаңартылды. Седанның дизайны өзгеріп қана қоймай, бағасы да құбылды. Бастапқыда 7.2 млн теңгеге бағаланған үздік нұсқасының құны бірден 8.2 млн теңгеге шарықтады. Анағұрлым қолжетімді Comfort 500 мыңға (6.8 млн теңге) қымбаттады.
Механикамен жұмыс істейтін 1.4 литрлік моторы бар Rio бұрын 5.5 млн теңгеге бағаланатын. Қазір тек 1.6 моторы мен автомат қорабы бар седан алуға мүмкіндік бар. Ең арзан Rio 6.5 млн теңге тұрады.
Комментариев: 0