Техастағы DFW Cars & Trucks базарында 2001 жылғы ВАЗ-2110 сатылымға қойылды. Ең қызығы, ғасыр басында шығарылған көлік 15.5 мың шақырым ғана жол жүрген.
Фотосуреттерден 20 жастағы «ондықтың» өте жақсы жағдайда екенін байқауға болады. Көліктің сырты мен техникалық жағы мінсіз деуге болады. Бірақ интерьері кішкене бүлінген. Иесі алдыңғы панельде жарықтар пайда болғанын айтады.
Капот астындағы 95 ат күшін беретін 1.6 литрлік қозғалтқыш механикамен жұмыс істейді. Машинаға электрлі әйнек көтергіш, өзгеше дөңгелектер және Pioneer магнитофоны орнатылған.
Көлік иесі ескі «ондықты» 11 мың долларға бағалап отыр. Бірақ ВАЗ-2110 кем дегенде тағы бес жыл қаңтарылып тұруы мүмкін. Себебі мұнда бастапқыда АҚШ нарығы үшін сертификатталмаған жасы 25-тен аспайтын көліктер тіркелмейді.
АҚШ-та бұл модель сирек кездескенімен, Қазақстанда қаптап жүр. Kolesa.kz порталында Lada 110-ның 3000 данасы сатылып жатыр. Бағасы 200 мың мен 5,5 миллион теңге аралығында. Бірақ бұл көліктердің тек 732-сі Қазақстанда тіркелген, қалғандары ресейлік нөмірде.
Комментариев: 0