20 млн теңге тұратын квадроцикл

Kolesa.kz порталында біздің елде ғана емес, әлемде өте сирек кездесетін квадроцикл сатылады. Бұл экземпляр жолсыз жерлер мен шөл даладағы жарыстарға емес, бұралаң тау жолы мен шоссеге арналған.

Құрастырушы «ересек ұлдарға арналған ойыншық» деп атаған квадроциклдың авторы — швейцариялық Вальтер Грютер. Инженер мамандығын бітірген ол мотоцикл сатушы болып жұмыс істеген. Алғашқы кезде Грютердің мотосалоны Moto Guzzi сатумен айналысты, кейін ассортимент BMW және Ducati-мен толықты. 1994 жылы Грютер жеке мототехника өндірісін қолға алып, 2000 жылдың басында GG Quad пішінді төрт дөңгелекті мотоцикл құрастырды.

GG Quad қапталында екі ірі боксы бар төрт дөңгелекті кәдімгі байк сияқты көрінеді. Бірақ іс жүзінде оның атақты мототехника өндірушілермен ортақ тұсы аз. GG Motorrad байктың алюминий рамасын, аспаның барлық элементін және тіреуішін жаңадан жасаған.

1 / 5

• 
• 
• 
• 
• 

1 / 5

Моторына келсек, GG Quad көпшілікке белгілі қозғалтқышпен жүреді. Бұған дейін екі дөңгелекті BMW R1150RT және ескі «гусь» жабдықталған 2 цилиндрлі көлемі 1130 куб сантимер болатын оппозит моторды GG Quad-қа да орнатты. Агрегат 95 ат күші мен 98 Нм момент береді. Момент артқы дөңгелекке 6 сатылы қорап және үйкеліс күші жоғары дифференциал арқылы беріледі.

Ұзындығы — 2223, ені 1397 миллиметр болатын GG Quad-тың салмағы бактағы 18 литр жанармайды қосқанда 400 келіге жуықтайды. Жоғары жылдамдығы — 185 км/сағ. Квадроциклды тежеуге алдында және артында 4 поршеньді суппорты бар 270 миллиметрлік дискілер жауап береді.

GG Quad-тың небәрі 200 данасы шыққан. Алматыда тұрған экземпляр 2006 жылдан бері небәрі 2200 шақырым жол жүріпті. Көлік зауыттан жаңа шыққандай күйде екен. Швейцария инженерлерінің ерекше туындысы 20 млн теңгеге (43.5 мың доллар) бағаланып отыр.