2 миллионнан аса ескі Toyota RAV4 ақау салдарынан өртенуі мүмкін

Toyota АҚШ, Канада және Мексикада сервистік кампания ұйымдастырып жатыр. Оған 2013-2018 жылдары шыққан 2.16 млн Toyota RAV4 иелерін шақырады. Капот астында тұрған аккумулятор штаттық орынға сәйкес келмейтіндіктен, кроссовер өртенуі мүмкін.

Wall Street Journal мәліметіне сүйенсек, қазір Солтүстік Америкада саудаланып жүрген кей Toyota RAV4-ке кішкентай батарея орнатқан сияқты. Сол себепті стандарт бекітпе дұрыс ұстамай, кілт бұрылғанда аккумулятор орнынан жылжып кетеді. Осы кезде бекітпе клеммаға тиіп, нәтижесінде қысқа тұйықталу болып, өрт тұтанады.

Компания осы ақау салдарынан болған өрт туралы ақпаратты нақтыламады. Алайда 2021 жылы Американың Ұлттық жол қозғалысы қауіпсіздігі басқармасы RAV4 иелерінен батарея аймағындағы қақпақтың қызып кетуі туралы 11 шағым түскенін хабарлады. Төрт жағдай көлік оталмай тұрғанда болған, ал қалған жартысында қозғалтқыш өшіп қалыпты. Ресми мәлімдемеге сүйенсек, NHTSA ол кезде Toyota-ға сервистік кампания ұйымдастыруды талап етпей, өндірушіге зерттеу нәтижесін көрсетумен ғана шектеліпті.

Бренд елеулі қауіп бар деген тұжырымға келген сияқты. Қазір компания мәселені шешу жолын қарастырып жатыр. Автомобиль иелері сервиске жүгінсе, оған жақсарған бекітпе элементтері мен клемма орнатып береді. Көлік иелерін 2023 жылдың аяғында дилерлік орталықтарға шақыра бастайды.