1548 ат күшіне ие Xiaomi SU7 Ultra-ның бағасы белгілі болды

Xiaomi Қытайда SU7 Ultra прототипіне негізделген SU7 седанының флагмандық нұсқасына алдын ала тапсырыс қабылдай бастады. Сериялы электромобиль прототиптің атауы мен 1548 ат күшіне ие агрегатын сақтап қалды, бірақ құрылымы біршама қарапайым болады. Суперседан 814 900 юань (56 млн теңге) тұрады.

1 / 10

• 
• 
• 
• 
• 
• 
• 
• 
• 
• 

1 / 10

Xiaomi SU7 Ultra-ның өлшемі — 5115×1970×1465 мм. Электрокар стандарт модельден үлкен, прототиптен кіші болады. Машина жаңа бампер, диффузор, табалдырық және үлкен антиқанатпен жабдықталған.

Салонда спорттық кресло бар, алькантара мен карбон пайдалану арқылы қара-сары реңкте әрленген.

1 / 9

• 
• 
• 
• 
• 
• 
• 
• 
• 

1 / 9

SU7 Ultra 1548 ат күші мен 1770 Нм беретін үш мотормен жүреді. Сериялы седан прототиптен ауыр, бірақ алғашқы жүздікті 2 секундта еңсереді. Ал 5.86 секундта 200 км/сағ-қа дейін жылдамдық алады. Ең жоғары жылдамдығы — 350 км/сағ. CATL өндірген сыйымдылығы 93.7 киловатт Qilin 2.0 аккумуляторын 11 минутта 10-нан 80 %-ға дейін қуаттауға болады. Жүріс қоры қазірше белгісіз.

Жаңа өнімнің тежеу ​​жүйесі ерекше болады. Седанның алдыңғы дөңгелегінде диаметрі 430 мм, артқы жағында 410 мм болатын карбон-керамика тежеуіш тұр. Бұл сериялы спорткарлар арасындағы ең үлкен тежеуіш саналады. Диск 1300 градусқа дейін қызуға шыдайды. Ол алдында 6 поршеньді, артында 4 поршеньді Akebono суппортымен жұмыс істейді. Электрокардың 100 км/сағ жылдамдықтағы тежеу жолы — 30.8 метр.

Компания өкілдері Қытайда Porsche Taycan Turbo GT 1 998 000 юань (137 млн теңге) тұрады деп айтты. Ал жаңа Xiaomi өнімі одан әлдеқайда арзан әрі қуатты.

1 / 5

• 
• 
• 
• 
• 

1 / 5

SU7 Ultra-ның қолма-қол саудасы наурызда басталады. 2025 жылы Xiaomi 4 мыңға жуық гиперкар сатуды жоспарлап отыр. Стандарт SU7-ге Қытайда әлі сұраныс жоғары. Xiaomi жыл аяғына дейін 100 мың автомобиль өндіріп, саудалауды жоспарлаған, бірақ бұл мақсат қарашада орындалады. Жаңа меже — 120 мың электрокар шығару.