Көлік құралының типін мақұлдау құжаты болмаса ЕЭО аумағында және Қазақстанда автобусты пайдалануға тыйым салынады. Бірақ бұл ережені айналып өтетін сәт туды.
Үкімет қаулысына сай Қазақстанда көлік құралының типін мақұлдау құжатының орнына көлік қауіпсіздігін растайтын куәлік көрсетіп, 175 автобусты есепке қоюға рұқсат етіледі. Құжат 4 қазанда жарияланды, ол он күннен кейін, яғни 15 қазанда күшіне енеді. Бұл жеңілдік сол күнге ғана жарамды.
Мұндай автобус Қазақстан аумағында ғана жүре алады.
Бұл қаулыны әу баста елге 175 Granton электробусын әкелу үшін арнайы дайындаған, құжат жобасында «ZonsonSmartAuto Corporation (ҚХР) шығарған 175 автобусты Қазақстанға „Алматы № 1 электроавтобус паркы“ ЖШС әкеледі» деп жазылған. Бірақ құжатқа қол қою барысында бұл ескерту жоқ болып шықты. Демек теориялық тұрғыда 15 қазанда Қазақстандағы кез келген автобус импорттаушы машинасын жеңілдікпен, атап айтқанда, көлік құралының типін мақұлдау құжатынсыз тіркей алады. Әрине, бір күнде барлық процедураны аяқтап үлгере алса.
Kolesa.kz редакциясына жеткен ақпаратқа сүйенсек, алғашқыда елімізде тіркеуді жоспарлаған 175 «грантонның» қазір алпысқа жуығы ғана есепке қоюды күтіп тұр. Инвестор Қазақстанда қаулы шыққанын күтпей, жүзден аса электробусты Өзбекстанға жіберіпті. Соған байланысты көлік қауіпсіздігін растайтын куәлік арқылы тіркеуге «орын» босап отыр.
Комментариев: 0