1305 ат күшіне ие Yangwang U7 Қытайда сатыла бастады

BYD концерні Yangwang суббрендінің жаңа моделін нарыққа шығарды. U7 гибрид немесе толыққанды электрокар ретінде саудаланады, ал қуаты 1305 ат күшіне жетеді. Жоғары технологиялық премиум көліктің бағасы — 628-708 мың юань (43.6-49.1 млн теңге).

Yangwang U7-нің екі модификациясы бір-біріне ұқсайды, алайда өлшемдері әртүрлі. Электромобильдікі — 5265×1998×1517 мм, дөңгелек базасы — 3160 мм. Гибридтікі — 5360×2000×1515 мм, ось арасындағы қашықтық — 3200 мм. Батареямен жүретін нұсқа төрт электромотормен жабдықталған, жалпы айналу моменті 1680 Нм-ге тең. Бұл машина алғашқы жүздікті 2.9 секундта еңсереді, ең жоғары жылдамдығы — 270 км/сағ, 135 киловаттық BYD Blade аккумуляторымен 720 шақырым жүріп өтеді.

1 / 10

• 
• 
• 
• 
• 
• 
• 
• 
• 
• 

1 / 10

Гибридтің батарея сыйымдылығы төмен — 52.4 кВт⋅сағ, бірақ дәстүрлі 2 литрлік оппозит қозғалтқыш орнатылған. Бұл Қытайда жасалған алғашқы осындай мотор. 60 литрлік отын багының арқасында гибридтің жалпы жүріс қоры 1000 шақырымға жетеді, ал іштен жанатын агрегатсыз 200 км жүруге болады.

U7-нің негізгі техникалық ерекшеліктерінің бірі — бейімді DiSus-Z аспасы. Ол лидарлар мен датчиктерден алған деректер арқылы жол жабынына сәйкес жүріс режимін алдын ала таңдай алады. Бір дөңгелек тесіліп қалса, аспасы үш дөңгелекпен 30 шақырымды 80 км/сағ жылдамдықпен жүріп өтуге мүмкіндік береді. Басқарылатын артқы дөңгелектермен бұрылу радиусы 4.85 метрге қысқарады және «краб режимі» мен «танк секілді кері бұрылу» функциясы бар.

God’s Eye жүргізуші ассистенттерінің кешеніне 3 лидар, 5 миллиметрлік және 12 ультрадыбыстық радар, 13 камера кіреді. Жүйе 2+ автономдық деңгейіне ие.

Yangwang U7 төрт немесе бес орынды болады. Интерьері экрандардың көптігімен ерекшеленеді. Алдыңғы панельде 12.8 дюймдік ортаңғы тачскрин, үлкен аспаптар панелі және алдыңғы жолаушыға арналған қосымша дисплей бар. Артқы орындықтарда да жеке экран қарастырылған. Комплектациясына байланысты алдыңғы әйнекке түсетін проекция және климат пен орындықты басқаруға болатын сенсорлы панель қосылуы мүмкін. Медиажүйе жасанды интеллект элементтері бар дыбысты көмекшімен және 23 Dynaudio динамигімен жабдықталған.

Автомобильдің Қытайдағы басты бәсекелестері — Mercedes-Benz EQS және BMW i7.