1 шілдеде автогаз қымбаттайды

Бұған дейін Энергетика министрлігі автогаз бағасын жылына екі рет көтеріп, 92-бензин құнының 70 %-ына жеткізуді жоспарлаған. Баға алғаш рет биыл қаңтарда өсті, жақында мекеме жанармай бекетіндегі шекті бағаны белгілеу туралы бұйрықтың жаңа жобасын дайындады.

Құжатқа сай 2024 жылғы 1 шілдеден бастап жанармай құю бекеттерінде автогаз бағасы өседі:

• Астанада — литрі 76 теңгеден 84 теңгеге;
• Алматыда — литрі 81 теңгеден 89 теңгеге;
• Шымкентте — литрі 64 теңгеден 70 теңгеге;
• Алматы облысы мен СҚО-да — 81 теңгеден (алыс аудандарда — 86 теңге) сәйкесінше 89 және 94 теңгеге;
• Ақмола облысында — 76 теңгеден (алыс аудандарда — 81 теңге) 84 және 89 теңгеге;
• Ақтөбе, Атырау, Маңғыстау облыстарында — 54 (59) теңгеден 59 (64) теңгеге;
• ШҚО, Қостанай, Қарағанды, Абай, Жетісу, Ұлытау облыстарында — 76 (81) теңгеден 84 (89) теңгеге;
• Жамбыл облысында — 71 (76) теңгеден 78 (83) теңгеге;
• БҚО, Қызылорда, Түркістан облыстарында — 64 (69) теңгеден 70 (75) теңгеге;
• Павлодар облысында — 74 (79) теңгеден 81 (86) теңгеге.

Әр облыстағы жанармай құю бекеттерінде автогаз бағасы шамамен 8–10 % өсіп отыр.

Энергетика министрлігі мұндай қадамға баруының бірнеше себебін атады:

• Қазір сұйытылған мұнай газының бағасы оны өндіру құнынан әлдеқайда төмен. Мысалы, отынның бір тоннасын өндіруге 60-70 мың теңге жұмсалса, зауыттар тоннасын 40 320 теңгеге сатып жатыр. Яғни, өндіруші кәсіпорындар әр тоннасын сатқан сайын 20-30 мың теңге шығындалады.
• Жылдан жылға сұйытылған газ тұтынатындардың саны артып барады. Былтыр елде тұтыну көлемі алдыңғы жылмен салыстырғанда 400 мың тоннаға, яғни 28 % өсті.

Аналитиктердің болжауынша биыл бұл көрсеткіш тағы 200 мыңға өсіп, 2.4 млн тоннаға жетеді. Ал тапшылық 30–40 % құрауы мүмкін.