Где покататься на горных лыжах вблизи Астаны

Астанаға жақын қай маңда таушаңғы тебуге болады

Астананың «тұрғылықты» адамдары Іле Алатауының көз үйренген баурайларын сағынышпен еске алып жатады. Елорданың ұзақ қысын шаңғы мен сноубордтың өткір жиектерімен кескілеп тастағың келеді де тұрады әсте. Сол үшін Алматыға не Өскеменге аттану керек пе сонда? Олай да болады. Бірақ бүгін «Колёса» сіздерге Астанаға жақын қай маңда тау шаңғысын тебуге болатынын баяндап бермек.

Алыс емес дегеніміз не және онымен қалай күресеміз

Алыс емес дегеніміз не және шаңғы жайлы дәл осы мақаланы неге сіз «Колёсадан» оқып отырсыз? Десе де бұлардың арасында байланыс бар. Біздің жағдайдағы алыс емес — бұл бір бағытқа 300 шақырымнан сәл асатын қашықтық, не ең кемі 233 шақырым. Егер жалға алған не өзіне тиесілі жабдығы болған жағдайда, астаналық таушаңғышылар үшін ең ыңғайлы көлік құралы автокөлік болады. Сіздің қанша күн жүретініңізге қарамастан, жол бұл шараның маңызды бөлігі болады.

Астанаға жақын қай маңда таушаңғы тебуге болады

Қайда жол тартамыз?

Біз көтергіштері бар әрі керек-жарақты жалға алуға болатын таушаңғы базаларына аттанамыз. Астанадан солтүстік-батыс бағытқа қарай ондайлардың үшеуі бар: «Ақжелкен», «Нұртау», «Елікті».

Біз екі күн ішінде үшеуіне де барып көрдік, алайда сіздің мақсатыңыз демалу болса — онда сізге осы бағытты қайталауға кеңес бере алмаймыз — шаңғы теуіп үлгермейсіз. Күніне бір базаға ғана барған жөн.

Астанаға жақын қай маңда таушаңғы тебуге болады

Көкшетау тас жолының Астана айналма жолымен қиысқан тұсынан Щучинск-Бурабай курорттық мекенінің аумағында орналасқан «Ақжелкен» таушаңғы базасына дейінгі қашықтық 233 шақырымды құрайды.

«Нұртау» деп аталатын екінші таушаңғы базасына дәл сол айналма жол арқылы бару үшін 245 шақырымды артқа тастау қажет болады.

Ал «Елікті» таушаңғы базасына жету үшін 312 шақырымды еңсеру керек.

Солтүстік тауларының сыры

Астанадан алыстаған сайын өрлей береді. Тауларды айтам. Қаладан алыстауды тас жолдардың кұрделену деңгейімен теңестіруге болатындай. Ең қарапайым беткей «Ақжелкенде» — жаңа бастаған шаңғышылар үшін ол аса ыңғайлы. «Нұртауда» тау биіктеу әрі оның беткейлері де тіктеу. Ал анағұрлым биік тауды, тік жарлар мен жолдардың алуандығын ең қашық орналасқан «Елікті» таушаңғы базасынан табасыз.

Астанаға жақын қай маңда таушаңғы тебуге болады

Артық шығыннан аулақ боламыз

Демалыс орындардың әрқайсысына баратын жолдың басым бөлігі Астана — Щучинск ақылы автомагистралі (жеңіл көліктен бір бағытқа 200 теңге) арқылы өтеді. Тас жолды төлем терминалдарына дейін ешқайда бұрылмастан толықтай өткеру қажет.

Қос бағытта да, яғни Астанадан шығар жолда, Дамса ауылының жанында (Астанадан 55 км), Ақкөлге бұрылатын тұста (90 км), Бұланды (190 км) қаласына қарама-қарсы, Щучинск (220 км) маңында жанармай құю бекеттері бар.

Жанармай бекетіне немесе елді мекенге қарай бағыт алғанда тас жолдан ауысамын деп айыппұл арқалауыңыз ғажап емес.Тежелу жолағы әдетте, ауысатын тұстан әлдеқайда бұрын басталады да, тұтас сызықпен белгіленеді. Оны байқамай қалып, тұтас сызықтан өтіп кетсеңіз болғаны, сол сәтте-ақ сізді жергілікті тәртіп сақшылары қуана-қуана тоқтатады. Белгі ережесінің бұзылуынан бөлек (5 АЕК. Такси жүргізуші Русикке рахмет!), олар қай шамдардың жанып тұрғанына зер салып, күндізгі жарық шамдарының орнатылуының дұрыстығына қатысты дауласуы да мүмкін.

Астанаға жақын қай маңда таушаңғы тебуге болады

Автомагистралінде рұқсат етілген жылдамдық 140/сағ. шегін құрайды, дегенмен ауа райының нашарлығына байланысты ол шектелуі мүмкін. Мұндай деректер тарифтік аймақтарды бөліп тұрған аркаларға ілінген арнайы тақталарда көрсетіледі. Дәл сол аркаларда жылдамдық өлшеуіштер де орнатылған.

Жол ережесіне қарамастан, жүргізушілердің барлығы дерлік магистральдің ортаңғы жолағымен қозғалады, ал оң жағы қыс мезгілінде қарға не мұзға көміліп жатады.

«Ақжелкен» таушаңғы базасы

Астанаға жақын қай маңда таушаңғы тебуге болады

Жақын маңда тағы не бар?
— Шипажайлар мен емханалар — 200 м-ден бастап
— Шортанкөл (Щучье) көлі — 500 м
— Жұмбақтас жартасы— 11 км
— Зообақ — 18 км
— Бурабайдың барлық көрікті жерлері < 30 км
— Казино — 10 км
— «Нұртау» таушаңғы базасы — 30 км
— «Елікті» таушаңғы базасы — 100 км

«Ақжелкен» таушаңғы базасы — біздің шолудағы көтергіші апта бойы жұмыс істейтін жалғыз база. Тым болмағанда әкімгермен сөйлесіп, бугель, яғни шаңғышы ілмегін (еңістің төменгі тұсындағы ағаш дүңгіршекте телефоны жазылған) түсіруді өтінуге болады. Керек-жарақтарды жалға алу жайында да сол әкімгермен келісесіз.

«Ақжелкен» таушаңғы базасы

Енді тау беткейі жайлы сөз қозғасақ. Аз ғана тәжірибе жинап алып, оны таушаңғы беткейі деп атау оңай. Трассаның параметрлерін өлшей келе, біз биіктік айырмасы 39 метрді құрайтын 300 метрлік ұзындыққа көз жеткіздік. Жоғарғы жағы сәл тік келсе, төменгі жағы жазықтау. Еңіске қарай түсу барысында кемі үш жерде көтергішке жармасуға мүмкіндік бар.

Трасса орман ішіндегі соқпақ жолды еске салады. Шеткі қарағайлар жұқа поролонды жаймалармен ұқыпты оралған. Бұл дәл сол ағаштарды қорғау үшін жасалды ма деген күдік бар, дегенмен, бұл жерде айтарлықтай екпін алу мүмкін емес сияқты.

Көтергіш жайлы әңгіме бөлек. Бұл тұтқалары (кейбірі жез түтіктерден жасалған) қозғалмалы арқанға тікелей бекітілген ескі ілмекті көтергіш. Оның астына құламаған дұрыс, әйтпесе келесі тұтқа жақындап келіп бөгеліп қалған шаңғышыны соғады.

Тау бөктерінің шыңында қирап тұрған кабинадан Шортанкөл (Щучье) көлі мен төңіректегі таулар көрінісін тамашалай аласыз.

Зейнеткерлік экстримге қарамастан, «Ақжелкен» жағымды ерекшеліктерге ие. Мұндағы климат курорттық аймақтың сыртымен салыстырғанда жайлы. Жергілікті тұрғындардың айтуынша, бес градусқа жылы көрінеді. Трасса орманда орналасқан, ал онда жел болмайды. Бұл сырғанап жүргендер үшін де, трасса үшін де үлкен артықшылық — тығыздығы жанға жағатын қар жеткілікті (ол ұшып кетпейді). Бұл шаңғы тебуді жаңадан бастағандарды үйрету үшін не оны мақсат етпейтін қарапайым демалушылар үшін таптырмайтын жер.

Керек-жарақ пен көтергішті қысқа мерзімге жалға алу құны «Ақжелкенде» басқалармен салыстырғанда сәл арзандау. Базадағы не соның төңірегіндегі пансионаттарға орналасуға да болады. «Щучинский» шипажайы орналасқан ауылда тұрғын үйлер жалға беріледі.

Бағалар бағамы

«Ақжелкен» таушаңғы базасы күн сайын 10:00-ден 18:00-ге дейін жұмыс істейді. Шаңғы мен көтергішті жалға алудың алғашқы сағаты (барлығы бірге) 2 500 теңге, ал екінші сағаты — 2 000 теңгені құрайды. Алайда «Ақжелкен» пансионатында тұратындар үшін жалға алудың әр сағаты алғашқысынан-ақ 1 500 теңге болады. Жалға берілетіні тек бәтеңкелі шаңғы мен үрлемелі тюбингтер ғана. Сноуборд жоқ мұнда, басқа жабдықтар да. Демалыс күндері тау баурайында нұсқаушы жұмыс жасайды, оның қызмет ақысы 1 000 теңгеден басталады. Пансионатта жайғасатын орындардың таңдауы кең, орналасу құны — адам басына 3 500 теңгеден басталады. Бұл қаражатты сіз душы жоқ стандартты бөлме үшін төлейсіз. Аталған бағалар 2018 жылдың басында өзекті болып табылады.

— Емделу
— отбасылық демалыс
— терренкур
— саяхат
— тарихи-мәдени және экологиялық туризм
— экстремалды спорт үшін таптырмайтын мекен.

«Ақжелкен» таушаңғы базасы

Бағыт-бағдар

Арақашықтық Көкшетау тас жолының Астана айналма жолымен түйіскен жерінен бастап көрсетілген. Осы және басқа да қашықтықтарды (және биіктіктер) біз Garmin BaseCamp бағдарламасының көмегімен осы сапарды бізбен бірге еңсерген Garmin навигаторы арқылы анықтадық.

Елордалық айналма жолдан 215 шақырым қашықтықта оңға қарай бет алып, Бурабай бағытындағы ауыспа жолға түсеміз. Щучинскті айнала сәл солға беттейтін жаңа жолмен қозғаламыз. Дәл айналмада қаланың шығыс бөлігін басып өтіп, Т-іспетті қиылыста Бурабай ауылына қарай оңға бұрыламыз.

2.4 шақырымнан кейін «Алмаз», «Щучинский» шипажайларына, Park House қонақ үйі мен «Жұмбақтас» пансионатына апаратын жолға, яғни солға қарай бұрылу керек. «Ақжелкен» таушаңғы базасы да сол жақта орналасқан. Шлагбаум алдында тоқтаймыз. Бұл жерде экологиялық алым төлеуге тура келеді, оның көлемі — адам басына 212 теңге.

Бұрылыстан тиісті жерге дейін 6.6 шақырым жүру қалады. «Ақжелкен» бұрылысы жол сілтегіштен кейін оң жақта, тағы да үш жүз метрді еңсеріп, сіз сонымен аттас пансионаттың аумағына енесіз.

«Нұртау» таушаңғы базасы

Астанаға жақын қай маңда таушаңғы тебуге болады

Жақын маңда тағы не бар?
— «Бурабай» ұлттық табиғи саябағы — 18 км
— Шипажайлар мен емханалар — 30 км-ден бастап
— Жұмбақтас жартасы — 32 км
— Зообақ — 40 км
— Казино — 30 км
— «Ақжелкен» таушаңғы базасы — 30 км
— «Елікті» таушаңғы базасы — 70 км

«Нұртау» таушаңғы базасында бір ілмекті көтергіш пен бірнеше трасса бар. Біздегі деректерге сәйкес, еңістің ұзындығы 600 метрден сәл асады, ал биіктік айырмасы — 102 метрді құрайды. Трассаны орман қоршап тұр, орта тұсында оның ені жүз метрге дейін жетеді, ал жоғарғы жағында — екі есе аз.

«Нұртау» таушаңғы базасы

Ең тік беткей тау тізбектерінің шыңында, одан сәл төменіректе трасса екіге жарылады, сирек орман арқылы трамплиндері мен сноубордшыларға арналған басқа да кедергілері бар сноупарктен бірақ шығуға болады. Бұл бөлік тау баурайының мүмкіндіктерін жағымды етіп түрлендіре түседі.

«Нұртау» жаңа бастаған және салыстырмалы түрде шыңдалған шаңғышыларға қажетті трассаларға ие десе болады. Мұнда шаңғы тебу үшін арнайы келудің мәні бар. Негізгі трассаның төменгі бөлігі — жаңа бастағандар үшін, орта тұсы мен сноупарк маңайы — шыңдалғандар үшін ыңғайлы болса, білігін жетілдіруге келгендер мен дәрежесі әлдеқайда жоғары шаңғышылар тау тізбектерінің шыңдары мен трамплиндерде жаттыға алады. Көтергішке тек трассаның ең төменгі бөлігінде ғана қосылуға болады. Мұнда нұсқаушылар бар.

Бағалар бағамы

«Нұртау» таушаңғы базасы жұма мен жексенбі аралығында және мереке күндері жұмыс істейді. Арқан жолмен серуендеу құны сағатына 2 500 теңге, немесе толық бір күнге 3 700 төлейсіз. Жеті жасқа дейінгі балалар үшін тегін. Шаңғылар жиынтығы (үлкендерге және балаларға арналған) мен сноубордты жалға алуға болады. Мұнда шаңғы үшін 3 300 теңге, сноуборд үшін 3 800 теңге төлейсіз сағатына, ал екі сағатқа алсаңыз 6 200 , егер бір күнге алуды қаласаңыз, оның құны 7 500 теңгені құрайды. Сондай-ақ бетперделер, шлемдер мен костюмдерді жалға алу мүмкіндігі бар. Алайда жабдықтар санының шектеулі екендігін бізге бірден ескертті. Сенбі және жексенбі күндері оларды түп-түгел талап алып кететін көрінеді. Еңісте нұсқаушы жұмыс істейді. Ол көрсететін қызметтің құны 3 000 теңгеден басталады. 5-7 адам сыятын үйшікті жалға алу үшін тәулігіне 35 000 теңге көлемінде қаражат жұмсайсыз. 2017/18 маусымында таушаңғы базасының жанында сыйымдылығы 3-5 адамға шақталған бөлмелердің үш түрін ұсынатын қонақ үй өз жұмысын бастаған. Мұнда орналасу бағасы 16 мыңнан 32 мың теңгеге дейін, бұл сомаға үш рет тамақтану мен әр тұрғынның арқан жолмен серуендеуіне мүмкіндік беретін бір күндік абонемент кіреді.

«Нұртау» таушаңғы базасы

Бағыт-бағдар

Дәл өткен жолғыдай, арақашықтықты біз Көкшетау тас жолының Астана айналма жолымен түйіскен жерінен бастап есептейміз.Тас жолдың бойындағы төлем терминалы арқылы өтеміз де қозғалысты Көкшетауға қарай жалғастырамыз. Щучинск бойымен жол елді мекен арқылы өтеді. Жылдамдық режимін сақтаймыз — бұл жерде ол қадағаланады.

Сызылған «Щучинск» деген тақтайшадан кейін магистраль аяқталып, бөлу жолағы бар жол басталады. Мұнда жылдамдық 110 км/сағ.межесімен шектелген (ҚР ЖҚЕ 10.3 тармағы). Тәртіп сақшылары арагідік жылдамдық режимін тексереді.

Елордалық айналма жолдан 244 шақырым алыстағанда «Нұртау» таушаңғы базасы деген жол сілтегішті көзіңіз шалады. База трассаның сол жағында орналасқан, сол себепті 300 метрден кейін қайта бұрылып, кері жолда дәл сондай қашықтықты артқа тастау керек болады. Содан кейін шақырымнан сәл аз жүрсеңіз болғаны, діттеген жеріңізге табан тірейсіз.

«Елікті» таушаңғы базасы

Астанаға жақын қай маңда таушаңғы тебуге болады

Жақын маңда не бар?
— Көкшетау қаласы — 25 км
— Зеренді курорттық аймағы — 60 км
— «Нұртау» таушаңғы базасы — 70 км
— «Бурабай» ұлттық табиғи саябағы — 90 км
— «Ақжелкен» таушаңғы базасы — 100 км

«Елікті» таушаңғы базасы

Біздің шолудағы таушаңғы базаларының ішінде «Елікті» осы ұғымға анағұрлым сәйкес келеді. Мұнда нағыз тау, ұзындығы 1 200 метрлік көтергіш, тау бөктерінің биіктігі 200 метрлік құламасы, трассалардың алуан түрі сіз үшін қолжетімді болады, әрі олардың бір бөлігі кәдімгідей күрделі.

Үрлемелі тюбингтермен сырғанауға арналған бөлек трасса мен көтергіш, сондай-ақ, сноупарк (біз барған сәтте онша жақсы күйде емес-тін — ондағы қарды жел ұшырып кетіпті) те бар. Оған қоса керек-жарақтар, бөлмелері сан алуан демалыс базасы, кең кафе, жоғары дәрежедегі қызмет көрсету, нұсқаушылар мен тіпті балаларға арналған ойын бөлмелері де бар екен. Сонымен қатар бұл орталықтың жеке сайты бар, ол тіпті «Шымбұлақтікінен» асып түседі. Бұл қалжың емес.

«Елікті» бейсенбі мен жексенбі аралығында жұмыс жасайды. Біз мұнда бейсенбі күні таңғы 11 шамасында келдік, сол себепті көтергіштің іске қосылуын біраз күтуге тура келді. Жарты сағаттан кейін ілмектер қозғала бастады, алайда трассаға шыққан бірнеше адамның көбі нұсқаушылар болды. Көтергіш те қатып қалғандай көрінді бізге — қозғалыс жылдамдығы әдеттегіден бәсеңдеу сияқты.

Сызбада ұзындығы 500 және 700 метрді құрайтын орта дәрежелі екі трасса мен аса күрделі (400 және 500 метрлік) үш трасса көрсетілген. Бұл сонда қалай болғаны, аспалы жол әлдеқайда ұзын емес пе? Мұның себебі мынада, біршама қиындау деген жолдар таудың етегінде аяқталады екен. Төмен түспес үшін, дәл сол жерден көтергіш ілмегін қағып алуға болады. Тау бөктерінің төменгі үштен бір бөлігі жаңадан үйреніп жүргендердің жаттығуына жарап жатыр.

Тау басынан қарағандағы көрініс керемет, бірақ өкпек жел өңменіңнен өтіп кетеді. Бөктердің жоғарғы бөлігін табиғат күшінен тау көлегейлеп тұрса, төменгі бөлігінде, дәл «Нұртау» базасындағы сияқты адуынды жел ұйтқып тұрады.

Бағалар бағамы

«Елікті» таушаңғы базасы бейсенбі мен жексенбі аралығында, сонымен қатар мереке күндері жұмыс жасайды.Бізге хабарлағандай, егер 15 адамнан кем емес топ база әкімдігіне алдын ала хабарласып, келуге ниет білдірсе, кез келген күні есігін айқара ашуға дайын екен. Басқа базалармен салыстырғанда мұнда баға жоғары, бірақ, олар тау беткейінің ұзындығы мен оның биіктігіне сай десе болады.

Арқан жолдың құны сағатына 3 000 теңге, екі сағатқа — 5 000, төрт сағатқа — 6 000, ал бір күнге — 7 000 теңге. Шаңғы жиынтығын жалға алу үшін 4 000 теңге (2017 жылы 500 теңгеге арзандау болатын) төлейсіз, сноубордты жалға аламын десеңіз 5 000 теңгеңізді дайындай береңіз, және бір айта кететіні, оны бір сағатқа алсаңыз да, жеті сағатқа алсаңыз да еш маңызды емес. Көтергіші бар «ватрушкаларды» жалға алу құны — 2 000 теңгеден 12 000 теңгеге дейінгі аралықты қамтиды. Бетперде, шлем, костюм сынды керек-жарақтарды да жалға алуға болады мұнда. Беткейлерде нұсқаушылар қызмет көрсетеді. Маңызды жәйт — уақытты белгілеу еңісте емес, кепіл ретінде қандай да бір құжат қалдыруыңызды талап ететін ресепшнде жүзеге асады.

Пансионаттағы екі адамдық стандартты бөлме 25 000 теңге көлеміндегі қаражатты қажет етеді (2017 жылдан бері 5 мыңға қымбаттаған). Бұл сомаға екі адамға шақталған таңғы, түскі және кешкі ас кріеді, мұнда жарты тәулікке ғана бөлме алу мүмкіндігі мүлде жоқ. Жартылай люкс үшін тәулігіне 25 000 теңге берсеңіз, саунасы бар кең люкс бөлмесі үшн қалтаңыздан 45 000 теңге шығарасыз. Бұл ретте 4-тен 16 жасқа дейінгі әр бала үшін қосымша 5 000 төлеуге тура келеді. Тағы бар айта кететіні, дүйсенбі мен бейсенбі күндері аралығында кез келген бөлме 5 000 теңгеге арзандау болады.

Бағыт-бағдар

Көкшетау тас жолының Астана айналма жолымен түйіскен жерінен бастап Көкшетауға қарай жылжимыз. Щучинск бойымен жүре отырып, біраз уақыттан кейін «Нұртау» таушаңғы базасының бұрылысынан өтеміз де Көкшетаудың шетіне дейін барамыз.

Астана айналма жолынан 287.5 шақырым асқан соң Қостанайға баратын тас жолға ұласатын Көкшетау маңындағы айналма жолдан солға бұрыламыз да, Рузаевка (Зерендіге бұрылмастан) бағытымен тік қозғаламыз.

23 шақырымды артқа тастаған соң «Елікті» таушаңғы базасы деген билбордтан солға қарай бұрылып, қара жолмен бір шақырымдай қозғаламыз.

Пайдалы кеңестер

Кез келген сапарға аттанар алдында ауа райын біліп алыңыз — тас жолдар жабық болуы мүмкін.

Егер ауа райы желді әрі суық болса, онда сіз алған керек-жарақтың басты атрибуты қалың балаклава (басты, маңдай мен бетті жақсы жауып тұратын бас киім) болуы тиіс.

Таушаңғы базасына азанмен келген дұрыс, себебі демалыс күндерінің ортасына таман жалға беретін орындардағы барлық құрал-саймандарды талап алып кетуі мүмкін.

Жағымды бонус

Үйге қайтар жолда Щучинск-Бурабай курорттық аймағы арқылы өтуге болады. 30 шақырымдық айналым сізге тек Бурабайдың қысқы сұлулығына тамсанып қана қоймай, әйгілі Жұмбақтас жартасының да жанына аялдауға мүмкіндік береді. Оның үстіне, оған тек қыста жақын баруға болады (Көгілдір шығанақтағы мұз үстінде серуендеу ары кетсе 15 минут уақытыңызды алады).

Бұл бағыттың бірнеше нұсқасын ұсынуға мүмкіндік бар. Алғашқысы, ең ұзыны (картада жасыл түспен белгіленген) — бұл Бурабай ауылы мен Щучинсктің шет бөлігі арқылы толық айналым. Тағы бір нұсқа ретінде Жұмбақтас жартасына дейін барып, көлдің көркін тамашалағаннан кейін кері қайтып, «Ақжелкен» таушаңғы базасының маңынан өтетін тас жолға (қызыл түспен белгіленген) түсетін бағытты айтуға болады. Ал ең қарапайым нұсқа — Жұмбақтасқа дейін барып, дәл сол жол мен тас жолға кері қайту. Бұл жерде ескерте кететін бір жәйт, бұл бұралаң жолдар көз тартар көркем ғана емес, едәуір қауіпті де. Себебі олар жатып қалған қардың қалың қабатымен көмкерілген, мұнда екпін алып, қарқынды қозғалуға болмайды. Оның үстіне, бұл бағыттардың барлығы да кіргені үшін адам басынан 212 теңге талап ететін Ұлттық саябақ арқылы өтеді. Демалысыңыз жақсы өтсін!

Комментариев: 0

Чтобы оставить комментарий, вам необходимо зарегистрироваться или авторизоваться.