Toyota дәстүрлі мотор өндірісін тоқтатпайды

Әлемдік автоконцерндердің көбі сұйық отын тұтынатын модельдер өндірісін 2035 жылға қарай толығымен тоқтатпақшы. Ол қатарда «тойота» құрамына кіретін Lexus те бар. Автоөнеркәсіп саласындағы компания басшыларының алдында сөз сөйлеген Toyota Motor-дың басқарма төрағасы Акио Тойода дәстүрлі моторы бар машина шыға беретінін айтты.

Тойода компанияның жаңа қозғалтқыш жасауға қатысты жоспарларын атап өтіп, электрлі көлік қуаттайтын бекеттер әлі дайын емес екенін және бүкіл әлемде «миллиард адам электр қуатынсыз өмір сүретінін» дәлел ретінде ұсынды. Toyota өнімдерін дамымаған аймақтарда сататындықтан, тек электромобильге көз жұмып сенудің мәні жоқ деп ойлайды.

Энергияның жаңа түріне көшу процесінің әлеуметтік аспектілері қозғалды. Компания мотор жасау өнеркәсібінде жұмыс істейтін миллиондаған жұмысшы мен инженерлерге алаңдайды, олар жұмыссыз қалуы мүмкін.

Журналистердің сұрағына жауап берген Тойода электромобиль үлесі оның даму деңгейіне қарамастан, әлемдік нарықтың 30 %-ынан ешқашан аспайтынына сенімді екенін айтты. Қалған 70 %-ын бензинді автомобиль, гибрид және отын ұяшықтарына негізделген модельдер құрайды. Бірақ дизельді қозғалтқыштың болашағы талқыланбады деп жазды Motor1.

Toyota былтыр бұрынғыдан көп көлік сатқан, бірақ 11 233 039-дың тек 104 018-і, яғни 1 %-дан азы электромобиль болған.