Утиль алымының өсуі Ресей көліктерінің импортына әсер ете ме

Министрлік Қазақстанға Ресей мен Беларусьтен кіретін техника үшін утиль алым мөлшерін он есе көтеруді ұсынды. Экология министрлігі тиісті бұйрықтың жобасын қайта қарап жатыр, техникалық түзету енгізгеннен кейін оны Әділет министрлігі тіркейді.

10 наурызда брифингіде Өнеркәсіп және құрылыс министрі Ерсайын Нағаспаев еліміз утиль алымды көтерген солтүстіктегі көршінің әрекетіне жауап ретінде осындай шара қабылдағанын айтты.

«Біз отандық автоөнеркәсіпті дамыту үшін осылай істеп отырмыз. Статистика бар, Ресейден келетін автомобиль көп емес, сондықтан көлік күрт қымбаттамайды. Бұл — нарық механизмі. Ресейден импортталатын техниканың үлесі — 3.7 %, сондықтан қауіп көріп тұрған жоқпын. Қазақстанда таңдау бар. „Нива“ немесе „Лада“ алуға болады, бірақ халық елде жасалған автомобильге немесе Қытай брендтеріне назар аудара бастады. Олар баға мен функция жағынан Ресей өнімдерінен жақсы. Сондықтан бұл шешіммен келісемін. Бұл ерекше шешім емес, тек қарсы жауап», — деді министр.

ҚАО дерегінше былтыр көрші елден 2842 «Лада» (нарықтың 1.21 %-ы) кірген. Қалғаны Ресейдің коммерциялық техникасы. GAZ, КамАЗ, «ПАЗ» және «Урал» Қазақстанда жасалады. Республика көлемінде қарасақ, Ресейден импортталатын көліктер бұрынғыдай көп емес. Былтыр еліміздегі ресми салондар 234 852 машина сатты, оның басым бөлігі Қазақстанда жасалған.

Ресейден импортталатын модельдерге арналған утиль алымының жаңа мөлшерлемесі қабылданған соң «лада» жеткізетіндер 6800 АЕК (29 410 000 теңге) төлейді.