Марканың bZ топтамасы екінші модельмен толықты. Toyota bZ4X кроссоверіне бұл жолы соған ұқсас стильде жасалған bZ3 қосылды. Жаңа көлік Toyota Corolla-ның қазіргі буынынан ірі: ұзындығы — 4725 мм, ені — 1835 мм, биіктігі — 1475 мм. Ал дөңгелек базасы Corolla түгіл Camry-ден де үлкен (2880 мм).
Модельдің сырт пішіні қандай болатыны бұрыннан белгілі, ал салонын алғаш көрсетті. Онда дәстүрді дәріптейтін Toyota-ға тән емес ерекшеліктер бары байқалады. Мәселен, инженерлер рөл астындағы стандарт қосқыштардан арылған. Бұрылыс көрсеткішін рөлдегі батырма, ал жарық пен әйнек сүрткішті арнайы джойстикпен басқаруды ұсынады. Жүргізуші жақтағы есік картасында әйнек көтеретін бір ғана батырма бар.
Ортаңғы консольде дәстүрлі түйме жоқтың қасы. Бүкіл функция медиажүйе планшеті арқылы басқарылады. Аспаптар панелі қызметін атқаратын екінші экран алдыңғы әйнекке жақын орналасқан.
Седан bZ4X және Subaru Solterra-мен e-TNGA платформасын бөліскенмен, батарея мен электромотор өзінікі. Оны марка серіктесі BYD компаниясынан алады. Көліктің жүріс қоры 600 шақырымға жетеді. Тұсаукесер кезінде техникасына қатысты көп мәлімет берілмеді, бірақ автомобиль 184 не 245 ат күшін беретін қозғалтқышпен жүретінін білеміз.
Бұрын да айтылғандай, bZ3 өндірісі аспан асты еліндегі FAW концернінің зауытында жыл аяғында басталады. Бұл автомобиль Қытайдан басқа елдерде сатыла ма, жоқ па, әзірше белгісіз.
Комментариев: 0