Tesla роботаксиін іске қосты

Компания роботакси қызметі Техас штатының Остин қаласында іске қосылғанын хабарлады. Америкадағы басылымдар сервис Tesla уәде еткендей толық жұмыс істемейді деп жазды. Оған кез келген адам міне алмайды, ал көлікте оператор отырады.

Tesla такси ретінде Model Y кроссоверін пайдаланады. Машинаны арнайы қосымша арқылы шақыра аласыз. Онымен сапарды басқарып, кей функцияны баптауға болады, артқы орындықтағы сенсорлы панель арқылы басқару мүмкіндігі де бар. Алдыңғы жолаушылар орнында оператор отырады, ол автомобильді басқармайды, тек процесс қауіпсіз болуын қадағалайды.

Tesla роботаксиді беделді БАҚ өкілдері мен оқырманы көп блогерлер сияқты таңдаулы пайдаланушыларға ғана ұсынды. Олар электрокар өте жұмсақ жүретінін, жол жағдайын, соның ішінде кедергілерді тамаша түсінетінін және жаяу жүргінші жолға шыққан жағдайда дәл әрекет ететінін атап өтті. Кейбіреулер шақырған көлікті таба алмағанын айтты. Қазір машиналар Остиннің шектеулі аумағында ғана жүр. Бұл күрделі қиылыстар мен кептеліс көп болатын көшелерді айналып өтетіндей етіп таңдалған.

Сервис толық іске қосылғанда Tesla-ның жүргізушісіз автомобильдерінің саны жиырмадан аспайды, бірақ кейін роботакси жүретін аумақ ұлғайып, көлік көбейеді. Tesla басшысы Илон Маск бірнеше айда электрокар саны бірнеше мыңға жетеді деп мәлімдеді. Мұндай көрсеткішке қол жеткізу үшін компания Tesla иелерін тартпақшы. Олар бос уақытта машинасын такси ретінде пайдалануға беріп, қосымша табыс таба алады. Әзірге бұл тек Model Y-ға қатысты, себебі Cybercab әлі дайын емес.