«Руссо-Балтъ С55»-тің бағасы мен комплектациясы белгілі болды

Былтыр қыста Пермь қаласындағы стартап қытайдың Weiqiao V90 көлігіне негізделген электрлі фургон шығарамыз деп мәлімдеген. Енді марка жаңа моделін көрсетті. Бұл — «кибертрак» тәрізді шанағы бар ірі кроссовер. Ол «Руссо-Балтъ С55» деп аталады.

Брендтің Telegram-каналында автомобильдің рендері пайда болды. Ол бір кластағы басқа көліктердің өлшемі мен дизайнын салыстыру үшін жасалған. 20 дюймдік дөңгелектері бар «Руссо-Балтъ С55-тің» қарапайым нұсқасы 550 ат күшіне ие екі электрлі қозғалтқышпен жабдықталған, үздік түрленімі жалпы қуаты 1000 ат күшіне тең төрт мотормен жүреді. Марка опция ретінде пневматикалық аспа, басқарылатын артқы дөңгелек және сипаттамасы әзірге белгісіз гибрид күштік құрылым ұсынады.

Салоны бес орынды кроссовердің базалық түрленіміне толық жетек жүйесі, панорамалы шатыр, екі қабатты бүйірлік әйнек, 15 дюймдік сенсорлы экран, желдеткіші мен жылытқышы бар былғарымен қапталған орындық, айнала шолу камерасы, сабвуфер және 8 динамикті аудиожүйе кіреді.

Тест-драйв биыл жаздың аяғында өтеді. Компания 2027 жылы алдын ала тапсырыс қабылдай бастайды. Базалық нұсқа 8 млн рубль (~48.6 млн теңге) тұрады. Руссо-Балтъ батареяға 5 жыл, автомобильге 3 жыл немесе 100 мың км кепілдік береді. Жарнамада машинаның шанағы ұзаққа шыдайды деп жазылған.