Ретсіз тұрған самокаттар үшін жалға беруші компания жауап береді

Әкімшілік полиция комитетінің төрағасы Қайсар Сұлтанбаев электросамокатты пайдалану тәртібін реттеуге тағы уәде берді. Ол бүгін Орталық коммуникациялар қызметіндегі баспасөз мәслихатында самокатты қауіпсіз пайдалану мәселесі толық шешілмегенін мойындады.

— Иә, расында проблема бар. Бүгін тағы 18:00-де кикшеринг компанияларының басшыларымен жиын өткіземіз. Негізгі проблемалар қандай? Бұл — тротуарда жүру, жылдамдық режимін сақтамау. Компания басшылары кезінде самокат тротуарда жүрсе жылдамдық 6 км/сағ-тан аспайды деп уәде берген. Бірақ ол орындалып жатқан жоқ. Сондықтан оларға заң аясында шара қолданамыз. Бәріңіз көріп жүргендей, жүргізушілер самокатты көрінген жерге тастап кетеді, ол жаяу жүргіншілерге кедергі келтіреді, жалпы бұл жағынан тәртіп жоқ, — деді Қ. Сұлтанбаев.

Комитет басшысы бұған дейін ІІМ әкімдікпен бірлесіп тұрақ жасау үшін компания жетекшілеріне жүгінгенін, бірақ бұл жұмыс әлі толық аяқталмағанын айтты. Осыған байланысты полиция айыпты тұлғаларды жауапқа тартпақ.

2025 жылдың 26 тамызындағы мәліметке сәйкес Құқықтық статистика комитеті жыл басынан бері электросамокат жүргізушілері қатысқан 143 жол-көлік оқиғасын тіркеген. Дәл осы кезеңде мопедшілер зардап шеккен апат саны 100-ге жетіпті, яғни бір жарым есе аз.