Mercedes-Benz ескі көліктерін шикізат ретінде пайдаланады

Mercedes-Benz Германияда ескі машинаны кәдеге жарататын пилоттық жобасын іске қосты. TSR фирмасымен бірге жиналған көліктің бәрін бөлшектеп, өңдейді. Компания жобаны «қаладан пайдалы қазба алу» деп сипаттады.

Бағдарлама Mercedes-Benz-тің үнемдеу және тұйық циклді өндіріске өту жоспары аясында жүзеге асады. Мұндай қадам компания зауыттарының Еуропа экологиясына әсерін азайтуға мүмкіндік береді. Шикізат өндіріп, өңдеуге кететін шығын азаяды.

Серіктестер жүруден қалған ескі техниканы мұқият бөлшектеп, қоршаған ортаға зиян заттарды алып тастайды. Қалғанын материал типіне (болат, алюминий, пластик, жез, әйнек) сәйкес сұрыптап, қайта өңдейді. Бұл істе TSR фирмасы инновациялық технологиясын пайдаланады. Дайын материалдар брендтің өндіріс цикліне оралады.

Компания осы әрекеті арқылы материалды ұқыпты қолдану тәсілін көрсетіп, біршама қаражат үнемдейді. «Қаладағы пайдалы қазбалар» марканың ұзақ уақыт салыстырмалы түрде арзан шикізат алуына жағдай жасайды. Жалпы стратегия бойынша қайта өңделген компоненттердің үлесі 40 %-ға жетуге тиіс. Бренд бұған алдағы он жыл ішінде қол жеткізуге ниетті.