Алматыда автобустар лық толы және жиі кешігеді. Неге?

Алматы қаласындағы жолаушы тасымалдау кәсіпорындары қауымдастығы автобус санын мәжбүрлі түрде қысқартатынын әкімдікке биыл қазанның аяғында ескерткен. Vlast.kz хабарлағандай, қала билігі қаңтардан бері жеке автопарктерге субсидияның тек 70 %-ын төлеген. Қазір қарыз 15 млрд теңгеден асты. Бұл сомаға «Алматыэлектротранс» ЖШС-нің берешегі кірмейді.

Тасымалдаушылар әлеуметтік желіде жариялаған үндеуінде қарыздың өсуі автобустарды жоспарға сай жолға шығаруға кедергі келтіріп жатыр деп мәлімдеді. Себебі жанармай, қосалқы бөлшек және басқа қажет ресурстарды жеткізу қиын. Салдарынан автопарктер қысқа дайындықты уақытында аяқтай алмауы ықтимал.

«Әкімдікке қысқа дайындалу керегін бірнеше рет жаздық. Өкінішке қарай сөзімізге ешкім құлақ аспады. Тек „Күте тұрыңыздар“ дегенді естиміз», — деді тасымалдаушылар.

Осы жағдайға байланысты олар 2 қарашадан бастап қала ішінде және сыртына қатынайтын қоғамдық көлік санын 30 %-ға дейін қысқартуға мәжбүр болатынын хабарлады.

«Тасымалдаушылар қоғамдық көліктің маңызын және оның санын азайту қала тұрғындарына әсер ететінін түсінеді. Бірақ субсидия жүйелі түрде кешігіп, берешек ұдайы өсіп жатса жолаушы тасымалымен айналысу кәсіпорындардың қаржылық тұрақтылығына қауіп төндіреді», — деп жазылған автопарк өкілдерінің әкімдікке жолдаған хатында.

Алматы қаласы Жол қозғалысын ұйымдастыру және жолаушылар көлігі басқармасы компанияларға автобустарды жоспарға сәйкес жолға шығаруды талап етіп, хабарлама жолдады. Ведомство қалған субсидияны төлеу мәселесі қала бюджетін түзеткен кезде қаралады деп уәде берді. Шенеуніктер субсидияның қалған бөлігін төлеуден бас тартпайтынын айтқанымен, берешекті нақты қашан өтейтінін айта алмады.

Биыл тамызда Алматы қаласының Жол қозғалысын ұйымдастыру және жолаушылар көлігі басқармасы қалалық жолаушы тасымалы тарифі жөніндегі комиссия отырысының хаттамасын жариялады. Онда қоғамдық көлік санын жұмыс күндері 20 %, сенбі 10 %, жексенбі 25 %, мереке күндері 35 %-ға қысқарту туралы жазылған. Хаттама 2026 жылғы 1 қаңтардан бастап туындаған құқықтық қатынастарға қолданылып, 2028 жылғы 31 желтоқсанға дейін күшінде болуға тиіс еді.

Алайда қазанның аяғында қала тұрғындарынан түскен көптеген шағымнан кейін оңтүстік астана әкімдігі тасымалдаушыларға қарбалас уақытта автобус санын көбейтуді ұсынды.

Бүгін, 4 қарашада Жолаушылар тасымалы қауымдастығы ресми мәлімдеме жасап, қазір мегаполистегі барлық жеке автопарк қалыпты режимде жұмыс істеп жатқанын хабарлады. Алматы әкімдігімен берешек мәселесі бойынша келісімге келіпті. Автобустарды қысқы маусымға дайындау жұмыстары жүріп жатыр.