Алматы көшелері жарқырай түспек

Биыл оңтүстік астанадағы 120 көшеге энергия үнемдеуіш жарықдиодты шамдар орнатылады.

Қалада қолайлы әрі қауіпсіз орта қалыптастыру мақсатында көшелерді жарықтандыру жүйелерін жаңарту және Алматыдағы белгілі нысандарға архитектуралық көмескі жарықтар орнату шарасы жалғасуда. Осы жылы қаладағы 120 көшеде жаңа LED-шамдардың пайда болатынын қала әкімдігінің баспасөз қызметі хабарлады.

Энерготиімділік және инфрақұрылымдық даму басқармасының деректеріне сүйенсек, бұрында Алматы көшелеріндегі жарық шамдардың 30 %-ы ескі газразрядты шамдардан жарықдиодты және энергия үнемдейтін шамдарға ауыстырылған екен. Мемлекеттік-жекешелік әріптестік аясында бірнеше жылда 42 мың бағана мен 46 мыңға жуық LED-шам орнату арқылы шамамен 1 400 шақырымды құрайтын сыртқы жарықтандыру желілерін жаңарту жоспарланып отыр.