Қырғызстанда сертификат алған автомобиль мен автокомпонентті Қазақстанға әкелуге болмайды

Тиісті құжат жобасын Сауда және интеграция министрлігінің Техникалық реттеу және метрология комитеті дайындады. Құжатқа сай «ЕЭС KG *** тіркеу нөмірі мен бірыңғай форманың сәйкестігін растау құжаты бар өнімді Қазақстанда пайдалануға және Қазақстан аумағына кіргізуге тыйым салынады». Бұл ереже 2024 жылғы 1 шілдеден кейін шыққан өнімдерге қатысты болады. Шектеу Қырғызстанда көлік құралының қауіпсіздігі туралы куәлік алған автомобильдер мен автокомпоненттерді де қамтиды.

Жоба авторлары Қырғызстандағы сәйкестікті растау органдары тиісті процедураны бұзып, кейде тіпті мүлде сынақ жүргізбей құжат рәсімдеп жатқанын айтты. Басқаша айтқанда, құжатты оңды-солды таратып жатыр. Қырғызстанда ресми тіркеліп, деректер реестріне енген декларация/сертификат интернетте сатылады, құжат 1-2 күнде дайын болады, бағасы 10 мың теңге ғана. (Қазақстанда өнімді сынақтан өткізу орта есеппен 70 мың теңге тұрады әрі оған 1-20 күн уақыт қажет).

Қазақстанда 400-ден аса тіркелген сынақ зертханасы бар, ал Қырғызстанда 43 қана (бізден 10 есе аз). Бірақ олар бізден бір жарым есе көп сертификат береді. Оның үстіне Қырғызстанда рәсімделген құжаттың 40 %-ы қазақстандық компанияларға берілген.

Қырғызстанда шенділер сәйкестік туралы декларация дайындаған кезде аккредитациясы жоқ зертханалардың сынақ протоколын қабылдай береді. Елде құжат рәсімдеу цифрлы жүйеге көшпеген. Бұл бақылауды әлсіретіп, заңсыз сертификат беруге жол ашады.

Сондай-ақ Қырғызстан заңында сәйкестікті растау тәртібін бұзған және заңсыз құжат жасағандарды жазаға тартатын талап жоқ. Салдарынан заңсыз сертификат жасауға қолайлы жағдай туған.