19 наурызда 00:00-ден бастап Нұр-Сұлтан мен Алматыда карантин режимі енгізілді. Алайда Нұр-Сұлтан дәл Алматы сияқты жабылған жоқ. Астаналық әкімдік берген ақпаратқа сай, карантин аймағына блокпосттар қойылған Талапкер, Қараөткел (Ильинка), Қоянды, Қосшы, Жібек Жолы ауылдары да қосылған. Ондағы тұрғындар тиісті құжаттарын көрсеткен жағдайда елордаға еркін кіріп-шыға алады.
Карантин кезінде әуежай, вокзал, әлеуметтік нысандар мен базарларда, сауда ойын-сауық орталықтары мен басқа да адам көп жиналатын жерлерде санитарлық өңдеу және дезинфекция жүргізіледі. Қалада шұғыл штаб құрылып, азаматтарға қажеттілік болмаса үйден шықпауға және барлық қауіпсіздік талаптарын қатаң сақтауға кеңес берілді.
ҚР ішкі істер министрі Ерлан Тұрғымбаевтың тапсырмасымен Ақмола облысының барлық бағыттағы тас жолдарына 14 қосымша мобильді бекет орнатылды. Олар астанадан 30 км қашықтықта орналасқан және онда 84 тәртіп сақшысы кезекшілік етеді. Бұл коронавирустың таралуын болдырмау үшін қолға алынған шара.
Полицейлердің бұйрығына бағынбағандар әкімшілік жауапкершілікке тартылып, 40 АЕК (106 мың теңге) көлемінде айыппұл арқалауы не 10 тәулікке дейін қамалуы мүмкін.
Осы жағдайға байланысты полиция қызметкерлеріне 8-716-2-29-90-31, 8-708-444-54-18 нөмірлері арқылы хабарласып, сұрақ қоюға болады.
Комментариев: 0