Мәміле жасау, көлікті есептен шығару, сатып алушының атына тіркеу және тіпті ұнаған нөмірге тапсырыс беріп, ақысын төлеу сынды әрекеттердің бәрін egov.kz көмегімен іске асыруға болады. Бұл әсіресе, коронавирус өршіп тұрған қазіргі уақытта өте өзекті болып отыр. Мұның кезең-кезеңімен қалай іске асатынын түсіндіреміз.
Көлік сатушыға не істеу керек?
1. Сатушы egov.kz-ке кіріп, ЭЦҚ көмегімен авторландырудан өтуі қажет, содан соң «Көлік және коммуникациялар» бөліміне, әрі қарай «Көлік құралының сәйкестендіру нөмірі бойынша көлік құралдарының […] тіркеу туралы куәліктер мен мемлекеттік тіркеу нөмірі белгілерін беру» бөліміне өтесіз. «Қызметке онлайн тапсырыс беру» батырмасын басыңыз. Бастаймыз!
2. Ашылған «1-қадам» жолағында көлік сатушының атына тіркелген машиналар тізімінен тиісті автокөлікті таңдаймыз да, «Әрі қарай» батырмасын басамыз.Экранда сатылатын автокөлік туралы ақпарат шығады, соны тексереміз.
«Әрі қарай» батырмасын басқанда серверге айыппұлдың, салық бойынша қарыздардың бар-жоғы және кепілзаттың статусы туралы сұраныс жіберіледі. Қарыздары болған жағдайда, сатушы оны онлайн (" 3-қадам«) төлеуі тиіс.
Дәл осы тұста сатушы машинадағы орын санын, көліктің бағасы мен көліктің болашақ иесі — сатып алушының ЖСН-ін көрсетуі қажет.
«Көлікті сатқаны үшін қаражат алынды. Кінәрат-талабым жоқ. Мәміле жасасуға келісетінімді растаймын» белгісі арқылы келісімді растаңыз, егер солай болса, әрине.
3. Сатушы өзінің ЭЦҚ-сын қайта енгізіп, өтінішке қол қою кезеңіне өтеді.
Сұраныс өңдеуге жіберіледі, бұл екі минуттан бір сағатқа дейінгі уақытты қажет етеді. Сатушы бұл уақытта сатып алушыға қайта тіркеу процесінің басталғанын хабарлайды. «5-қадам» бөлімінде «Статусты жаңарту» батырмасын басу арқылы сұраныстың жай-күйін білуге болады.
Көлікті сатып алушы не істеуі керек?
1. Сатушы тарапынан сұранымға қол қойылғаннан кейін сатып алушы жеке ЭЦҚ көмегімен egov.kz-ке кіріп, «Қызмет алу тарихы» сілтемесі бойынша сұранысты табады да, «Мақұлдауды күту» жазбасын ашып, сұраным статусы көрсетілген бетке өтеді. Сатып алушы бірден «5-қадамға» өтеді (қорқудың қажеті жоқ!), әрі қарай «Сұранысты көру» батырмасын басқан соң, қайта «2-қадамға» өтесіз.
2. «2-қадам» жолағында сатып алушы автокөлік туралы мәліметтерді тексереді. Тексердіңіз бе? «Әрі қарай» батырмасын басамыз — әкімшілік айыппұлдарды тексеру басталады.
3. Содан соң рәсімдеуге көшеміз, «Беруші мекеме» дегенді таңдаймыз. Бұл сатып алушы тұратын өңірдегі/қаладағы көлік тіркелетін орган, әрі қарай мемлекеттік нөмір типін таңдаймыз (1А — екі нөмір де тік бұрыш пішінді, 2А — тік бұрыш және шаршы пішінді).
Егер үйге жеткізу қажет болса, «КҚТК және МТНБ мекенжай бойынша жеткізуге тапсырыс беру» қызметін таңдаңыз, мекенжай көрсетілетін қосымша терезе ашылады.
«Жоғары сұранысқа ие МТНБ» белгісін таңдағанда ҚР ІІМ-нің ақпараттық жүйесіне VIP-нөмірлер тізімін алуға сұраныс жіберіледі. Таңдауға ұсынылатын нұсқалар бөлек бетте ашылады.
Белгі болмаған жағдайда автоматты түрде қарапайым нөмірлер тізімі ашылады.
Нөмір таңдадыңыз ба? Таңдасаңыз, «Әрі қарай» батырмасын басып, мәміле жасасуға келісетінімізді растаймыз. Сізді қайта «5-қадамға» өткізеді, мұнда төлем статусы пайда болғанша 2-3 минут күтесіз.
«Төлем жасау» батырмасы пайда болған соң төлем жасайтын бетке өтеміз.
4. Бұл шешуші кезең. Мемлекеттік баж салығын онлайн төлеу қажет. Деректердің барлығын тексеріп, төлем жасаңыз.
Айтпақшы, не үшін төлейміз?
- мемлекеттік нөмір үшін — автокөлікке 2.8 АЕК, мотоцикл не тіркемеге 1.4 АЕК;
- техникалық төлқұжат (МТНБ) — 1.25 АЕК;
- тіркеу үшін төленетін алым — 0.25 АЕК;
- егер сұранысы аса жоғары нөмірлер таңдаған болсаңыз, оның ақысын төлейсіз.
Төлем жасап болған соң сатып алушыға сұранысты растауға арналған диалогтық терезе ашылады. Дайын!
Әрі қарай не болады?
Сатып алушы сұранымды растағаннан кейін сұраным ҚР ІІМ-нің ақпараттық жүйесіне жіберіледі, орган қызметкері автокөлікті жаңа иесінің атына қайта рәсімдейді. Сатып алушы мен сатушының жеке кабинетіне құжаттың дайын болғаны туралы хабарлама келеді.
Расталған соң сатушы ескі техникалық құжат пен мемлекеттік нөмірлерді сатып алушыға беруі тиіс. Ал соңғысы мамандандырылған ХҚКО-на барып, ескі нөмірлерді құжаттармен бірге өткізіп, жаңасын алады.
Егер сатып алушы құжат пен нөмірлерді үйге жеткізуге тапсырыс берген болса, ескісін курьерге тапсырады. Құжат пен нөмірлер келесі күні жеткізіледі, қызметтің құны 1 400 теңге.
Онлайн режимде қайта рәсімдеу барысында нені ескеру қажет?
? Қайта рәсімдеу процедурасы басталған сәттен ол аяқталғанға дейін автокөлікті жүргізуге тыйым салынады.
? Стандартты түрде онлайн-тіркеу процедурасы 60 минуттан артық уақыт алмауы тиіс.
? Егер сұраным сағат 16:00-ге дейін жіберілсе, машина дәл сол күні есепке қойылады. Ал егер 16:00-ден кейін рәсімделсе, процесс келесі күні жүзеге асады.
? Сатушы, автокөлікті есептен шығаруды растамас бұрын көліктің ақшасын алуыңыз керек. Мұқият болыңыз!
Комментариев: 0