Haval екінші буын DaGou (Қытайдан тыс жерде Dargo деп аталады) кроссоверінің жаңа нұсқасының алғашқы суреттерін жариялады. Сырт келбетінде айтарлықтай айырмашылық болмайды, бірақ жаңа күштік құрылыммен жабдықталады. Соның арқасында Dargo алғаш рет толық жетекті гибридке айналады.
Haval Dargo Hi4 басқа нұсқаларына моножетекті DHT гибридіне ерекше сұлбасымен, қырлы радиатор торымен және домалақ жарықдиодты фарасымен ұқсайды. Логотиптегі көк түс жаңа өнімнің бензоэлектрлі екенін меңзейді.
Hi4 — 1.5 литрлік моторды электр энергиясын өндіру үшін де, дөңгелектерді айналдыру үшін де пайдаланатын тізбекті параллель жүйе. Бензин қозғалтқыштан бөлек алдыңғы және артқы осьте екі электрлі мотор бар.
Автомобильдің қозғалтқыштары жүргізу жағдайы мен батарея қуатына байланысты бірнеше режимде өзара әрекет ете алады. Сондай-ақ тарту күшін ось арасында үлестірудің бірнеше нұсқасы бар: электроника моментті динамикалық түрде түрлендіріп, тартылыс векторын басқара алады. Кроссовер автономдықтың 2+ деңгейіне ие жүргізуші көмекшілерінің жинағымен жабдықталады.
Басқа сипаттамалары 25 наурызға жоспарланған жаңа өнімнің ресми премьерасында белгілі болады. Haval Raptor кроссоверін де ұқсас күштік құрылыммен жабдықтаған. Бұл модель алғашқы жүздікті 6 секундта еңсереді және 20 киловатт батареяның арқасында қуаттаусыз шамамен 100 шақырым жүре алады.
Толық жетекті гибрид Dargo жол талғамайтын модификация ретінде ұсынылуы мүмкін.
Комментариев: 0