25 сәуірде желіде оннан аса полиция көлігінің қара Mercedes-Benz седанын қоршауға алған сәті түсірілген видео жарияланды. Видеоға қосымша «20-30 жасақ қатысқан қуғын осылай аяқталды» деп жазылған.
Tengrinews.kz сайты Алматы қаласының ПД-не сілтеме жасап хабарлағандай, оқиға 25 сәуір таңертең болған. Полицейлер тәртіп бұзушыны Әл-Фараби даңғылы мен Мұстафин көшесінің қиылысында байқайды. Автокөлік жоғары жылдамдықпен жүріп, жолда қауіпті жағдай тудырған. Жүргізуші полиция талабына бағынбай, қашып кетуге тырысқанмен, Райымбек даңғылының солтүстігіндегі Тілендиев көшесінде ұсталды.
Көлік тізгінінде 1992 жылы туған ер адам отырған. Ол мас күйінде көлік жүргізгені үшін 2020 жылы қыркүйекте 1,5 жылға жүргізуші куәлігінен айырылған екен. Бұл жолы оның есірткі қолданғаны сараптама нәтижесінде анықталды.
Полиция мәліметіне сүйенсек, құқық бұзушыға қатысты Қылмыстық кодекстің 346-бабы бойынша тергеу басталды. Жүргізуші куәлігінен айырылған және есірткі пайдаланған адам көлік құралын басқарса, 5000 АЕК айыппұл төлеуден бастап 5 жыл мерзімге бас бостандығынан айыруға дейін жаза белгіленген. Сонымен қатар машина айдау құқығынан өмір бойына айырылады.
Mercedes-Benz жүргізушісі Қылмыстық кодекстің бір бабымен ғана айыпталып отырған жоқ. Тәртіп сақшыларынан қашқанда бірқатар жол ережесін бұзғаны үшін оның атына 15 әкімшілік хаттама толтырылды. Оның ішінде полицияға бағынбау, бағдаршамның қызыл түсіне өту, маневр жасау ережесін бұзу және т.б. себептер бар.
Комментариев: 0