Škoda Қазақстан нарығына қайта оралатынын Kolesa.kz былтыр күзде хабарлаған. Енді марканың ресми саудасы 17 сәуірде басталатыны белгілі болды.
Алдымен Қазақстан жұртына жақсы таныс Kodiaq кроссоверінің бірінші буыны саудаға шығады. Бұған дейін модельді Өскемендегі «Азия Авто» зауыты ірі торапты әдіспен құрастырған. Әлемдік нарықта тұсаукесері былтыр 5 қазанда өткен екінші буындағы «Кодиак» Қазақстанға қашан келетіні қазірше белгісіз.
Дилер Kodiaq-ты үш комплектацияда сатады: Ambition, Style және Sportline. 2 литрлік турбомотормен жүретін толық жетекті машина 18 690 000 теңге тұрады. Көлік құралының типін мақұлдау құжатына сүйенсек, «Кодиактың» 1.4 литрлік турбомотормен жүретін нұсқасы болады. Оның саудасы кейінірек басталады.
2024 жылдың екінші жартысында топтамаға Karoq және Kamiq кроссовері қосылады. Олардың құжаты дайын. Олармен бірге төртінші буындағы Škoda Octavia да келеді. Бірақ ол лифтбек бола ма, әлде универсал бола ма, белгісіз. Барлық модельді Қостанайдағы Allur зауыты құрастырады.
Астана, Алматы, Шымкент, Қарағанды, Ақтөбе, Семей және Қостанай қаласында чех брендінің жеті автосалоны ашылады. Марка модельге 5 жыл немесе 150 000 шақырымға кепілдік береді.
«Шкоданың» Қазақстанға оралғанына қалай қарайсыз?
Комментариев: 0