JAC компаниясы жасаған 2 литрлік турбодизель және 6 сатылы беріліс қорабымен жүретін жаңарған УАЗ «Патриот» биыл күзде нарыққа шығады.
Моторы 136 ат күші мен 320 Нм беретін автомобильді (серияға шығатын машина емес, сынақ экземпляры) «Известия» басылымы автомобиль бөлімінің редакторы Кирилл Сазонов тізгіндеп көрді.
Автомобильдің сынақ нұсқасын басқару жеңіл, беріліс қорабында бес сатылы УАЗ қорабындағыдай кемшіліктер жоқ екені белгілі болды. Автожурналист дизельді «Патриот» салонында діріл сезілмейтінін айтты, дегенмен, машина қарқын алған кезде турбинаның ысқырған дыбысы естіледі.
Әу баста коммерциялық техникаға арналған 2 литрлік агрегат пен 6 сатылы қорап жұбының өзіндік ерекшелігі бар, мысалы, бірінші беріліс өте қысқа, соған сай машина орнынан күрт қозғалады.
Жол талғамайтын көлік жақсарған мультимедиа, электромеханикалық үлестіргіш және жарықдиодты оптикамен жабдықталады. Мұның бәрі машина бағасына әсер ететіні анық. Бірақ УАЗ модель құнын әлі жариялаған жоқ.
Комментариев: 0