Жүргізуші полицейлерді жауапқа тартты

Оқиға Батыс Қазақстан облысында, Кирсаново — Орал тас жолында болды. Полиция Toyota Land Cruiser-ді тоқтатып, жүргізушіге бірнеше хаттама толтырып жатқан кезде жол талғамайтын көліктің иесі қызметтік машинаның алдыңғы әйнегіндегі сызатты байқап, тәртіп сақшыларының өздерін жауапқа тартты.

View this post on Instagram

A post shared by Мой ГОРОД (@mgorod.kz.zko)

БҚО Полиция департаменті Toyota жүргізушісі бірнеше жол ережесін бұзғанын айтты. Ол маневр жасау ережелерін сақтамаған, жылдамдықты асырған, ақауы бар және рұқсатсыз қайта жабдықталған көлікті жүргізген.

Жүргізушінің шағымынан кейін патрульдік Kia Cerato жүргізушісі де жазаланды. Полицей айыппұл арқалады, ақауды жою үшін автомобиль базаға жіберілді.

Жол ережесі бойынша жүргізуші жақтағы әйнекте (сүрткіш жұмыс істейтін тұста) сызат болған жағдайда техниканы тізгіндеуге болмайды.

Әкімшілік кодекстің 590-бабының 5-бөлігіне сәйкес, техникалық регламенттер мен ұлттық стандарттарға сай келмейтін және ақауы бар немесе пайдалануға тыйым салынған көлікті басқарған жағдайда 5 АЕК (биыл 19 660 теңге) көлемінде айыппұл салынады.