Жүргізуші куәлігін «сатқан» тиктокер ұсталды

Полиция 45 адамды алдаған блогерді Шымкентте қолға түсірді. Тергеушілердің дерегінше пысық «кәсіпкер» TikTok-та саудасын қыздырыпты. Ол үшін арнайы парақша ашып, жүргізуші куәлігін тез әрі еш қиындықсыз алуға көмектесем деп жарнама жасаған көрінеді. Клиент тарту үшін жалған уәдені үйіп-төгіп, түрлі бейнежазба жариялаған.

Мегаполистегі полиция департаменті қылмыскер аңқау елден 20 млн теңгеден аса ақша алғанын айтты. Шұғыл шара жүргізген тәртіп сақшылары күдіктіні ұстап, қамап қойған. Қазір алдын ала тергеу жүріп жатыр, мамандар заңға қайшы қосымша фактілер бар-жоғын анықтайды.

Анықтама ретінде: Интернет арқылы алаяқтық жасағандар қазір 4000 АЕК (биыл 17 300 000 теңге) айыппұл төлейді не сол мөлшерде түзету жұмыстарына тартылады, не болмаса 1000 сағатқа дейін қоғамдық жұмыс атқарады немесе 4 жылға дейін бостандығы шектеледі немесе дәл сол мерзімге түрмеге жабылып, мүлкі тәркіленеді.

Бірнеше мәрте қылмысқа барып, ірі көлемде ақша жымқырған тұлға (20 млн шығын дәл осы санатқа кіреді) заңсыз иеленген мүлкінен екі-үш есе көп мөлшерде айыппұл төлеп, жиған-тергенінен айырылып қана қоймай, 3 жылдан 7 жылға дейін бас бостандығы шектеледі не сол уақытын темір торда өткізеді.