Жиналмалы шатыры бар «гелендваген» оралады

Mercedes-Benz күтпеген жерден жаңа G-кластың алғашқы суретін жариялап, 2013 жылы конвейерден кеткен кабриолет қайта оралатынын хабарлады. Премьерасы 8 қыркүйекте Мюнхен автосалонында өтеді.

Бұрын матамен қапталған жиналмалы шатыр негізінен үш есікті «гелендвагенге» орнатылатын, тизердегі көлік бес есікті. Әзірге төбесі ашық автомобильдің сұлбасы ғана көрінеді және шатыры жиналған күйде пикапқа ұқсайды. Бұл G-класта толыққанды артқы есік қалатын сияқты. Тек артқы қатардың үстіндегі бөлік ашылуы ықтимал.

Осындай «гелендваген» сәнді салоны, екінші қатарда бөлек орындықтары және қуаты артқан қозғалтқышы бар Maybach G 650 Landaulet моделін қайта шығаруға мүмкіндік береді. 2010 жылдардың екінші жартысында мұндай түрленімнің 99 данасы жарық көрген еді.

Алдын ала мәлімет бойынша кабрио-гелик G-кластың стандарт күштік құрылымымен жабдықталады. Оған 449 ат күші бар 6 цилиндрлі мотор және 585 ат күшіне ие V8 кіреді. Электрлі G 580 with EQ Technology-дің осындай модификациясы болатын шығар, бірақ қазір батареялы геликке сұраныс аз.