Жеке зертханалар жүргізушіні тексере алмайды

Биыл қаңтарда сенатор Жанна Асанова мемлекеттік мекемелерден бөлек жеке зертханаларға да жүргізушінің алкоголь немесе есірткі тұтынғанын анықтауға рұқсат беріп, қорытындысын ресми мойындауды ұсынған. Ол сауалында Алматыда небәрі екі зертхана бар екенін мысалға келтіріп, оларға жету қиын, кезек көп, сол үшін жүргізушілер балама сараптамадан өтіп үлгермейді деді. Депутат «зертхананы таңдау немесе тәуелсіз қайта тексеріс жүргізу мүмкіндігі болмағандықтан, азаматтардың қорғану және нәтижені объективті тексеру құқығы едәуір шектеледі, бұл медициналық тексеріс рәсіміне деген сенімді азайтады» деп санайды.

Премьер-министр Олжас Бектенов жауап хатында елде қазір 300 медициналық тексеріс орталығы жұмыс істеп тұрғанын жазды. Медициналық тексерістің қорытындысы электрондық жүйеде сақталады, оны ешкім өзгерте алмайды. Сыбайлас жемқорлық қаупін болдырмау және орталықтан бақылау үшін тексеріс нәтижесі автоматты түрде прокуратура мен ішкі істер органына жолданады.

«Қазір жеке зертханалар медициналық тексеріс жүйесіне қосылуға техникалық және ақпараттық тұрғыда дайын емес. Сондықтан жеке зертханалардың медициналық тексеріс жүргізуіне рұқсат беру мәселесін кезең-кезеңімен іске асыру керек, ол үшін ақпараттық жүйені медициналық тексерістің электрондық жүйесіне қосып, рұқсат беру тетігін, аккредитация тәртібін және зерттеу нәтижесін ресми мойындау ережесін заңнама деңгейінде пысықтау қажет», — деді үкімет басшысы.

Оның сөзінше «тексеріс орталықтарын көбейту мақсатында шалғайдағы мекемелерде тексеріс кабинетін ашу жоспарланып отыр, бұл жұмыс орнында медициналық тексеріс жүргізуге мүмкіндік береді».

Полицейлер жүргізушіні алкоголь ішкен немесе есірткі тұтынған деп айыптауға дайын тұрады деген шағым көп айтылады. Былтыр мұндай заңсыз әрекет көбеймесе, азайған жоқ. Қазанда тіпті полиция қызметкерлерінің есірткі тестінің нәтижесін қолдан жасағаны әшкере болған.