Жанармай қымбат болса қайда шағымдану керек

Биыл 16 қазанда билік АИ-92 мен дизельдің бағасын көтеруге мораторий жариялады. Дегенмен кейбір бекет сұйық отын құнын өсірді. Осындай заң бұзатындармен күресу үшін Энергетика министрлігі мен Бәсекелестікті қорғау және дамыту агенттігі 1 қарашадан бастап тәулік бойы жұмыс істейтін жедел желіні іске қосты. Байланыс нөмірі: +7 701 855 0248. Жүргізушілер АИ-92 бензині мен дизель қымбаттаса не газ болмаса осы нөмірге хабарласа алады.

Жедел желі қызметкерлері Kolesa.kz редакциясына хабарлағандай, арызданушы жанармай немесе газ құятын бекеттің нақты мекенжайын, қай отын түріне қатысты проблема барын және аты-жөні мен телефон нөмірін айтуы қажет. Бұдан басқа жеке мәлімет қажет емес. Мамандар 5–10 минут сайын шағым түседі деді. Олар күніне шамамен 200 қоңырауға жауап береді, көбіне Түркістан, Жамбыл облысы және Алматы қаласының тұрғындары хабарласады екен. Оның ішінде газға қатысты шағым жиі түседі.

Энергетика министрлігі әр өңірге сұранысқа қарай жанармай жөнелтеміз және сұйық отын мұнай базаларында жеткілікті деп мәлімдеді. Сондықтан жанармай тапшы болмайды. Кей өңірдегі газға кезек тапшылықпен емес, үлестіру және логистикамен байланысты. Министрлік сұйытылған мұнай газын өндіретін зауыттардың бірінде жөндеу жүріп жатқанын алдын ала ескеріп, көгілдір отынның көлемін ұлғайтқан.

Энергетика министрлігі мен Бәсекелестікті қорғау және дамыту агенттігі алыпсатарлар мен қолдан тапшылық туғызатындардың жолын кесетінін ескертті.