Жанармай бағасы қалай өзгерді

2025 жылы 30 қаңтарда Қазақстан билігі АИ-92 маркалы бензин мен дизель бағасын реттеуден бас тартты. Энергетика министрі Алмасадам Сәтқалиев алда АИ-92 құны Ресейдегі бағамен теңесуі мүмкін деп болжаған. Көрші елде мұндай бензиннің бір литрі 300 теңге тұрады. Бірақ шенді баға күрт өспейтінін, алғашқы өзгеріс 5 теңге мөлшерінде болатынын айтты.

Түзету күшіне енгеннен кейін жанармай құятын бекеттер бағаны бірден көтерген жоқ. Арада бір айдан аса уақыт өткен соң ғана жанармай нарығының негізгі ойыншылары өзгеріс енгізе бастады.

Қазір Qazaq Oil АИ-92-нің әр литрін 209 теңгеден сатып жатыр. Алматыдағы «Газпромнефть», Helios және Sinooil бекеттерінде АИ-92 207 теңге тұрады. Ал Royal Petrol 205 теңге деңгейін әлі сақтап тұр. 30 қаңтарға дейін мемлекет бағаны осы шекте ұстап отырған.

Royal Petrol жазғы дизельді де қымбаттатқан жоқ. Бекеттер оны 295 теңгеге құяды. Қысқы дизельдің құны — 580 теңге. «Газпромнефть» дизель отынын 297 теңгеден саудалап жатыр. Ал Sinooil, Qazaq Oil және Helios оны 299 теңгеге ұсынады.

АИ-95 Алматыдағы ірі жанармай желілерінде 270–275 теңгеге сатылып жатыр, бірақ брендтелмеген отынды 279 теңгеге алуға болады.

Астанада да жанармай бағасы осыған ұқсас АИ-92 — 207–209 теңге, АИ-95 — 263–269 теңге, дизель — 295–299 теңге. Ал Шымкентте АИ-92 біршама арзан — 198 теңге, АИ-95 — 250–255 теңге, дизель — 299 теңге.