Жаңарған Voyah Free-дің бағасы белгілі болды

Премиум Voyah бренді Қытайда жаңа Free+ моделіне алдын ала тапсырыс қабылдай бастады. Жаңа өнімнің интерьері өзгеріп, электроникасы жақсарған. Соған қарамастан бастапқы бағасы небәрі мың юань (72 мың теңгеге жуық) өскен. Қазір Voyah Free+ 229 900 юаньға (шамамен 16.65 млн теңге) бағаланып отыр.

Автомобильдің экстерьері бұрынғы пішінін сақтағанымен, кейбір жері өзгерген. Алдыңғы бөлігінде жаңа бампер және фара арасына жайғасқан диодты панель пайда болды. Көлік жаңа дискілер алды. Бұл өзгерістер аэродинамикаға оң әсер еткен. Өлшемдері — 4915×1960×1660 мм, дөңгелек базасы — 2960 мм.

Кроссовер салонында бұрынғыдай үш дисплейі бар алдыңғы панель жоқ. Енді Free+ интерьерінде екі бөлек экран (ортаңғы дисплей — 15.6 дюйм) бар. Медиажүйені, 29 дюймдік проекциялық дисплей және жүргізуші ассистенттерінің кешенін Huawei әзірледі. Мамандар жаңа рөл орнатып, трансмиссия селекторын рөл жаққа ауыстырды.

Әзірге Voyah Free+ тек гибрид ретінде шығады. Базалық модификация 129 ат күшін беретін 1.5 литрлік бензинді қозғалтқышпен және артқы осьтегі 292 ат күшіне ие электромотормен жүреді. Ең жоғары жылдамдығы — 180 км/сағ. Үздік комплектацияның алдыңғы осіне тағы бір электромотор қосылып, жалпы қуаты 476 ат күшіне жетеді. Максимал жылдамдығы — 200 км/сағ. Автомобиль 43.2 кВт·сағ батареяның арқасында электр қуатымен 196–235 шақырым еңсереді.

Бұған дейін Voyah Free Қытайда және шетелде электромобиль ретінде саудаланды. Free+ әзірге гибрид, бірақ электрлі нұсқасы кейінірек шығуы мүмкін.