Үшінші буындағы Superb жарыққа шыққанына төрт жыл өткеннен кейін өндірушілер үлгіні жаңартуды ұйғарды. Лифтбек пен универсал Братиславада таныстырылды. Сырттай өзгешелігін бамперлерінен, ұлғайтылған радиатор торынан және жаңа шамдарынан байқауға болады. Артқы бөлігіндегі шамдарды жалғап тұрған хромдалған көлденең жолақ пен логотип орнындағы Škoda деген жазу ерекше көзге түседі.
Салонда онша өзгеріс жоқ. Мұнда хромнан сәл үлкендеу виртуалды аспаптар панелі, 9.2 дюймдік экраны бар өзге мультимедиалық кешен мен жаңа әрлеу материалдары пайда болған. Машина жолға бейімделуге қауқарлы круиз-бақылау мен оқыс жағдайда көлікті жол жиегіне өзі қоя алатын Emergency Assist жүйесімен толықты.
Superb үлгісінің мотор гаммасында үш дизельді және екі бензинді агрегат бар. Қозғалтқыштар 120-дан 190 күшке дейін беретін 1.6 және 2 литрлі төрттіктермен ұсынылады. Үздік нұсқасы тек DSG роботымен жұптасады. Бензинді моторлар қатарында көлемі 1.5 және 2 литрді құрайтын үрмелі төрттіктер де бар. Олар 150 және 280 аттың күшін береді.
Superb гибридті моторды да иеленді. Мұндай көлік iV деп аталатын жаңа суббрендтің алғашқы өнімі болып табылады. Ол 156 арғымақтың күшіне ие 1.4 литрлік TSI көмегімен қозғалысқа келеді, ол өз кезегінде, 115 күш беретін электрлі мотормен және 6 сатылы DSG-мен жұптаса жұмыс істейді. Гибрид тек қана электр қуатымен 55 шақырымды еңсере алады.
Рестайлингтен өткен темір тұлпардың Қазақстанға қашан жетері белгісіз. Қазіргі таңда біздің нарықта тек 220 және 280 ат күшіне ие (толық жетекті) 2 литрлік бензинді моторға ие Superb қана сатылып жатыр. Мұндай лифтбектер 10.2 млн-нан 14.6 млн теңгеге бағаланады.
Комментариев: 0