Жаңарған Geely Coolray Қазақстанда қанша тұрады?

Geely-дің Қазақстандағы ресми өкілдері жаңарған Coolray кроссоверінің бағасын жариялады. Автомобиль сырттай жаңа бампер мен сәл өзгерген радиатор торы бар басқаша алдыңғы бөлігімен, сондай-ақ бампер мен жүксалғыш қақпағының пішіні өзгерген артқы бөлігімен ерекшеленеді.

Салонда өзгеріс көп. Қымбатырақ нұсқаларында алдыңғы панельдегі 10.25 дюймдік екі дисплейді біріктіріп тұрған планшеттің орнына 14.6 дюймдік мультимедиа экраны орнатылған, оның қасында 8.8 дюймдік цифрлық аспаптар панелі тұр. Қарапайым көлікте монохромды аспаптар панелі мен мультимедиа тачскрині (8 дюйм) болады.

Coolray бұрынғыдай 174 ат күшіне ие (290 Нм) 1.5 литрлік бензинді турбомотормен жүреді. Қозғалтқыш айналу моментін 7 сатылы робот қорап (DCT) арқылы алдыңғы дөңгелектерге береді.

Жаңарған Coolray үш комплектацияда сатылады: Standard, Comfort және Flagship. Автомобиль бағасы 9.7 млн теңгеден басталады. Бұл сомаға жарықдиодты оптика, алдыңғы және бүйірлік қауіпсіздік жастығы, артқы көрініс камерасы, артқы парктроник, шина қысымын бақылау жүйесі, круиз-бақылау, барлық креслоны жылыту, климат-бақылау, жарық сезгегі, монохромды аспаптар панелі, 8 дюймдік мультимедиа экраны, алты динамикті аудиожүйе және т.б. жабдықтары бар машина алуға болады.

Рестайлингке дейін Coolray 14.2–15.8 млн теңге тұрған, демек модель жаңарған соң біршама арзандады. Бірақ акциялар мен жеңілдікті ескергенде бұрынғы кроссовердің бағасы 9.7–11 млн теңге болады.

Орташа комплектация 10.3 млн теңгеге бағаланып отыр. Жабдықтар тізіміне электрлі жиналатын бүйірлік айна, 14.6 дюймдік мультимедиа дисплейі, 17 емес, 18 дюймдік дөңгелек дискісі және кілтсіз ашу жүйесі кіреді.

Ал 11.3 млн теңге тұратын ең қымбат түрленім қауіпсіздік пердесі, люгі бар панорамалы шатыр, жүргізуші орындығын электрлі реттеу, жаңбыр сезгегі, жүксалғыш қақпағының электржетегі, айнала шолу камерасы, реңді цифрлық аспаптар панелі, видеотіркеуіш, смартфонды сымсыз қуаттау жүйесі және үздік көмекшілер кешенімен (бейімді круиз-бақылау, автоматты тежеу, жолақта ұстау жүйесі және т.б. бар) ерекшеленеді.

Flagship-ке арналған қызыл түсті тежеуіш суппорты, спойлер және басқа креслоны қамтитын Sport опциялар пакеті бар. Оның бағасы — 700 000 теңге.