Жаңарған Chery Tiggo 4 Қазақстанда қанша тұрады

Елімізге жаңарған Chery Tiggo 4 келді. Компания кроссоверді алғаш рет былтыр көктемде Уху қаласында өткен брендтің халықаралық бизнес-конференциясында таныстырды.

Кроссовердің алдыңғы бөлігі Tiggo 7 Pro Max-қа ұқсайды, ал артқы жарық техникасы енді жарықдиодты моношам түрінде жасалған. Жаңа шанақ панельдерінің арқасында автомобиль 2 мм ұзарды. Салондағы басты өзгеріс — аспаптар панелі мен медиакешен экранын біріктіретін үлкен планшет.

Chery Tiggo 4 әртүрлі күштік құрылыммен екі комплектацияда сатылады. Elite нұсқасына 113 ат күшіне ие 1.5 литрлік атмосфералы мотор және вариатор орнатылған. Luxury деп аталатын үздік модификацияда 147 ат күшін беретін 1.5 литрлік турбомотор бар, ол 6 сатылы роботпен жұптасқан.

Tiggo 4 Elite тек алдыңғы қауіпсіздік жастықтары, базалық электронды көмекшілер жинағы, жарық сезгегі, кілтсіз ашу жүйесі, круиз-бақылау, алдыңғы орындықтарды, рөлді, алдыңғы әйнекті, әйнек жуғыш бүріккішін және бүйірлік айналарды жылыту жүйелерімен жабдықталған. Мультимедиа экраны мен цифрлы аспаптар панелінің өлшемі — 10.25 дюйм. Орындықтары қолмен реттеледі және экобылғарымен қапталған.

Luxury нұсқада 18 дюймдік дискілер, люк, бүйірлік қауіпсіздік жастықтары, жүргізуші көмекшілерінің ауқымды жинағы, айнала шолу камерасы, жаңбыр сезгегі, бейімді круиз-бақылау, автоматты тежеу, жолақта ұстау жүйесі бар. Бұл жиынтыққа екі аймақты климат-бақылау, артқы орындықтарды жылыту, алдыңғы орындықтарды электрлі реттегіш, атмосфералы жарық, смартфонды сымсыз қуаттағыш, алты динамигі бар аудиожүйе кіреді. Салоны екі түсті.

2024 жылғы базалық Tiggo 4-тің бағасы 10 млн теңгеден басталса, Биыл шыққан машинаның ең арзанын 10.2 млн теңгеге (жеңілдік пен арнайы ұсынысты есептемегенде) алуға болады. Luxury комплектациясы 11.6 млн теңге тұрады.