Жаңарған Changan Uni-V Қазақстанға келді: не өзгерді және қанша тұрады

Changan-ның Қазақстандағы топтамасы Алматыдағы Astana Motors Manufacturing Kazakhstan зауытында жасалатын жаңарған Changan Uni-V лифтбэгімен толықты.

1 / 10

• 
• 
• 
• 
• 
• 
• 
• 
• 
• 

1 / 10

Автомобильдің экстерьері жаңа бампермен ерекшеленеді. Соның арқасында ұзындығы 4740 мм-ге жетті, бұрын 4680 мм еді. Мамандар жаңа жарық техникасы мен белсенді спойлер орнатыпты. Есік тұтқасы бұрынғыдай жасырын емес.

Рестайлингке дейінгі лифтбэктің салонында дисплейлер жан-жақта тұратын. Жаңарған нұсқаның интерьерін қазіргі қытай көліктерінің стиліне бейімдеген. Онда шағын цифрлық аспаптар панелі мен 14.6 дюймдік мультимедиа планшеті бар. Дизайнерлер жалпақ рөлден де бас тартты.

Басты техникалық өзгеріс капот астында. Енді Changan Uni-V 181 ат күшіне ие 1.5 литрлік қозғалтқышпен емес, 235 ат күші мен 390 Нм момент беретін 2 литрлік турбомотормен жүреді. Ол 7 сатылы DCT робот қорабының орнына 8 сатылы Aisin автоматымен жұптаса жұмыс істейді.

Машинаның жалғыз комплектациясы 11.6 млн теңге тұрады. Яғни жаңа өнім 1 млн теңге қымбаттады. Жабдықтар тізіміне алдыңғы және бүйірлік эйрбэг, қауіпсіздік пердесі, жүргізуші ассистенттерінің жинағы, парктроник, айнала шолу камерасы, жарық пен жаңбыр сезгектері, барлық орындықты жылытқыш, алдыңғы орындықтарды желдеткіш, рөл, айна және алдыңғы әйнекті жылытқыш, 10 динамикті аудиожүйе кіреді.