Жаңарған Audi Q4 e-tron

Audi компаниясы буын ауыстырған жол талғамайтын батареялы Q4 e-tron-ның өзгерістерін жариялады. Автомобильдің мотор гаммасы қайта қаралып, аккумуляторы оңтайландырылды, сонымен қатар опциялар тізімі артып, аспасы қайта бапталған. Бағасы 52.9 мың еуродан басталатын модельге Еуропада айдың аяғында тапсырыс қабылдай бастайды.

1 / 6

• 
• 
• 
• 
• 
• 

1 / 6

Audi Q4 e-tron-ның күштік электроникасындағы жаңалық — 286 ат күшін беретін электромотор. Бұндай қозғалтқыш кей Volkswagen ID-де тұр. Кроссовердің артқы жетекті нұсқасы осындай қозғалтқышпен алғашқы жүздікті 6.7 секундта, толық жетекті түрі 0.1 секунд кейін еңсерсе, ал қуаты 340 ат күшіне тең қымбат түрленімі 5.4 секундта алады. Жоғарғы жылдамдығы — 180 км/сағ.

Бренд бұрынғы 82 киловаттық аккумуляторды сақтап қалды. Бұдан бөлек күштік құрылымды жаңа температураны бақылау жүйесімен жабдықтады. Осының арқасында қуаттау уақыты (28 минутта 10-80 %) азайып, жүріс қоры ұлғайды. Енді кроссовер 562 шақырым жол жүреді. Бұл рестайлингке дейінгі автомобильден 30 шақырым көп.

Q4 e-tron-ның барлық нұсқасында (стандарт, спорттық және бейімді) аспа мен рөлдік механизм қайта бапталды. Осының арқасында басқару дәлдігі мен жолда жүру жайлылығы арту керек. Оған «цифрлы кокпитпен» және навигациямен жабдықталған медиажүйе, орындықты жылыту, пердешемен жабылған жүксалғыш есігі мен дыбыс генераторы кіреді.

Концерн Q4 e-tron-ды шамамен екі жыл бұрын таныстырған, сол кезден бері электрокар өз құнын жоғалтқан жоқ. Биыл алғашқы жартыжылдықтағы қорытындыға сүйенсек, Q4 e-tron мен оның купе тәріздес нұсқасына сұраныс бір жарым есе өсіпті.